تۇركىستان وبلىسىندا 2 مەكتەپتىڭ ليتسەنزياسى توقتاتىلىپ، ايىپپۇل سالىندى
ءبىلىم زاڭناماسىن بۇزعانى ءۇشىن 12 لاۋازىمدى تۇلعاعا نۇسقاما بەرىلگەن. سونداي- اق، ەكى مەكتەپتىڭ ليتسەنزياسى ۋاقىتشا توقتاتىلىپ، 115 ايلىق ەسەپتىك كورسەتكىش كولەمىندە ايىپپۇل سالىندى. بۇل تۋرالى وڭىرلىك كوممۋنيكاتسيالار ورتالىعىندا وتكەن بريفينگتە وبلىستىق ءبىلىم سالاسىندا ساپانى قامتاماسىز ەتۋ دەپارتامەنتىنىڭ باسشىسى باقىتجان مۇحامەدجانوۆ مالىمدەدى.
«مەملەكەتتىك باقىلاۋ شارالارىن ورىنداۋ بارىسىندا جوسپارعا سايكەس، بيىلعى جىلدىڭ 1-جارتىجىلدىعىندا پروفيلاكتيكالىق باقىلاۋ جۇرگىزىلگەن. ناتيجەسىندە 30 ءبىلىم ۇيىمىندا كەمشىلىكتەر انىقتالىپ، نۇسقاما بەرىلدى. بۇدان وزگە، دەپارتامەنت تاراپىپىنان ق ر «پەداگوگ مارتەبەسى تۋرالى» زاڭىنىڭ تالاپتارىن بۇزعانى ءۇشىن 2 لاۋازىمدى تۇلعاعا شارا قولدانىلدى. سونداي- اق، زاڭناماعا سايكەس بالالاردىڭ ءبىلىم ۇيىمدارىنداعى ساباققا دۇرىس قاتىسۋىن قامتاماسىز ەتپەگەنى ءۇشىن اتا- انالاردى اكىمشىلىك جاۋاپكەرشىلىككە تارتۋ تۋرالى قاۋلى شىعىپ، 29170 تەڭگە كولەمىندە ايىپپۇل سالىندى»، - دەدى باقىتجان قالجان ۇلى.
دەپارتامەنت تاراپىنان وبلىس اۋماعىنداعى مەكتەپتەردە ءبىلىم بەرۋ ۇيىمىمەن بەكىتىلگەن پەداگوگيكالىق ادەپ بويىنشا كەڭەستىڭ قۇرىلماۋى، پەداگوگ- زەرتتەۋشىلەردىڭ، پەداگوگ- شەبەرلەردىڭ ۇلەسى %35 دان كەم بولۋى سىندى دەرەكتەر انىقتالعان.
