كوروناۆيرۋسقا قاتىستى جالعان اقپارات تاراتقاندار 2 جىلعا سوتتالۋى مۇمكىن
انكارا. انادولى - قازاقپارات - تۇركيادا كوروناۆيرۋسپەن اۋىرعاندارمەن بايلانىستا بولعان ادامدار تۋرالى جالعان اقپارات تاراتقاندار 3 ايدان ەكى جىلعا دەيىن تۇرمەگە جابىلۋى مۇمكىن.
بۇل تۋرالى قازاقپارات انادولى اگەنتتىگىنە سىلتەمە جاساپ حابارلايدى.
اگەنتتىكتىڭ حابارلاۋىنشا، ازاماتتاردىڭ بەلگىلى ءبىر ساناتى ناۋقاستاردى، اسىرەسە جەكە سەكتور قىزمەتكەرلەرىن وقشاۋلاۋدىڭ ەكونوميكالىق سالدارىن بولدىرماۋعا ۇمىتتەنىپ، پوليتسيا مەن دەنساۋلىق ساقتاۋ مينيسترلىگىنىڭ قىزمەتكەرلەرىنەن بايلانىستارى تۋرالى اقپاراتتى جاسىرعاندى ءجون كورەدى. مۇنداي ارەكەتتەر زاڭمەن قۋدالانادى جانە تۇركيانىڭ قىلمىستىق كودەكسىنىڭ 206-بابىنا سايكەس 3 ايدان ەكى جىلعا دەيىن باس بوستاندىعىنان ايىرۋ نەمەسە ايىپپۇل قاراستىرىلعان دەپ كورسەتىلگەن.
سوڭعى مالىمەتتەر بويىنشا، تۇركيادا كوروناۆيرۋس ينفەكسياسى جاعدايلارىنىڭ سانى 308069 عا جەتتى، ونىڭ 270 مىڭنان استامى اۋرۋىنان ايىقتى.
اۆتور: گۇلزات اقجولوۆا
