قازاقستاندا 2 مىڭنان استام ينتەرنەت-دۇكەن جۇمىس ىستەيدى
«قازىرگى ۋاقىتتا كوپتەگەن ادام ونلاين ساتىپ الۋدىڭ تيىمدىلىگى مەن ىڭعايلى ەكەنىن ءتۇسىنىپ، ونى ۇيرەنىپ جاتىر. البەتتە، بۇل ءۇردىس ودان ءارى جالعاسادى. بۇگىن دە تۇتىنۋشىلار تاۋار ساپاسىنا كوبىرەك نازار اۋدارۋدا. حالىقارالىق ەسەپتەرگە سايكەس، تۇتىنۋشىلاردىڭ %40 ى برەندتىڭ سەنىمدىلىگىنە قاراي تاۋاردى تاڭدايدى. ەلەكتروندىق ساۋدا سالاسىنداعى كومپانيالاردىڭ كوپشىلىگى ساتىپ الۋشىنى تارتۋدىڭ نەگىزگى فاكتورلارى رەتىندە تاۋارلار تۋرالى دەرەكتەردىڭ وزەكتىلىگى مەن تاۋارلاردى بەلسەندى وڭدەپ ساتىپ الۋشىعا دەيىن جەتكىزۋدى اتاپ وتۋدە»، - دەدى باقىت سۇلتانوۆ ۇكىمەت وتىرىسىندا.
ونىڭ ايتۋىنشا باسقا الەمدىك ترەندتەردىڭ ىشىندە ترانسشەكارالىق ونلاين-ساۋدانى جانە لوگيستيكانى دامىتۋ ءۇشىن مەملەكەتتەر اراسىنداعى حالىقارالىق ىنتىماقتاستىقتىڭ كۇشەيۋىن اتاپ ءوتۋ ماڭىزدى.
«COVID-19 پاندەمياسى ونلاين ساۋدانىڭ ايتارلىقتاي وسۋىنە الىپ كەلدى. B2C ارنالارى بويىنشا ساتۋدى ارتتىردى. B2C ارنالارى بويىنشا ساتۋدىڭ ارتۋى اسىرەسە ءدارى-دارمەكتى، تۇرمىستىق زاتتاردى جانە ازىق-تۇلىك ونىمدەرىن ونلاين ساتۋدا بايقالادى. قازاقستاندا 2 مىڭنان استام ينتەرنەت- دۇكەن جۇمىس ىستەيدى. الايدا سالىق جەڭىلدىكتەرىن الۋ ءۇشىن تابىس سالىعىن تولەۋدەن بوساتىلعان 601 ينتەرنەت-دۇكەن تىركەلگەن. «قازپوچتا» ا ق مالىمەتىنە سايكەس 2020-جىلعى 1- جارتىجىلدىقتا ەلەكتروندىق ساۋدا نارىعىنىڭ كولەمى 435 ميلليارد تەڭگەنى قۇرادى. بۇل بولشەك ساۋدانىڭ جالپى كولەمىنىڭ %9,4 ىن قۇرايدى. وسى جىلدىڭ سوڭىنا دەيىن 900 ميلليارد تەڭگەگە ءوسىم بولجانۋدا. 2022-جىلعا قاراي بۇل كورسەتكىش بولشەك ساۋدانىڭ جالپى كولەمىنىڭ شامامەن %13 ىن قۇراي وتىرىپ، 1,9 تريلليون تەڭگەگە جەتەدى»، - دەدى ول.
