شىعىس قازاقستاندا اقاۋ شىققان ان-2 ۇشاعى ءماجبۇرلى تۇردە ءبيداي القابىنا قوندىرىلدى
ۆەدومستۆونىڭ حابارلاۋىنشا، 17- شىلدەدە التاي اۋدانىندا ان-2 ۇشاعى ءبيداي القابىنا قونۋعا ءماجبۇر بولعان.
«ۇشاق وسكەمەن قالاسىنان التاي قالاسىنا ۇشىپ بارا جاتقان. وسكەمەننەن 40 شاقىرىمعا ۇزاعاننان كەيىن اۋا تەمپەراتۋراسىنىڭ جوعارىلىعىنا بايلانىستى قوزعالتقىشتىڭ تەمپەراتۋراسى ءتيىستى پارامەتردەن اسىپ كەتكەن. توتەنشە جاعدايعا جول بەرمەۋ ءۇشىن ەكيپاج قاۋىپسىز ورىندى تاڭداپ الىپ، قونۋعا ءماسجبۇر بولدى. قوزعالتقىشى سالقىنداعاننان كەيىن ول جەردەن ۇشىپ شىعۋ قاۋىپتى ەكەنى بەلگىلى بولدى. توپىراق جۇمساق بولعان سوڭ ۇشاقتىڭ اۋدارىلىپ قالۋ قاۋپى بار ەدى»، - دەدى شىعىس قازاقستان وبلىسىنىڭ اۆاتسيالىق بولىمشەسىنىڭ ديرەكتورى ۆيكتور گۋباريەۆ.
وسىدان كەيىن ەكيپاج اۆتوكولىك جولى ارقىلى ۇشىپ شىعۋ تۋرالى شەشىم قابىلدادى.
ۆيكتور گۋباريەۆتىڭ ايتۋىنشا، ءوتىپ جاتقان ادامدار جول بويىندا بەكەت جاساپ، ۇشاق اۋەگە ءساتتى كوتەرىلگەن.
قازىرگى ۋاقىتتا اتالمىش وقيعا بويىنشا قىزمەتتىك تەرگەۋ جۇرگىزىلىپ جاتىر. اكىمدىكتىڭ حابارلاۋىنشا، ۇشاق قازاۆياورمان شارۋاشىلىعىن قورعاۋ قىزمەتىنىڭ تاپسىرماسى بويىنشا شەكاراداعى ورماندى شولىپ شىقپاق بولعان. ويتكەنى رەسەيلىك شەكارا قىزمەتى قازاقستان اۋماعىنان ءتۇتىن شىعىپ جاتقانىن حابارلاعان.
ۇشاقپەن ول جاق تەكسەرىلىپ، ەشقانداي ءورتتىڭ جوقتىعىن انىقتاعان. الايدا وسىدان كەيىن ساعات 15.52 كەزىندە رەسەيدىڭ التاي رەسپۋبليكاسى بويىنشا ت ج م كەزەكشى بولىمىنەن ش ق و اۋماعىندا ورماننىڭ ورتەنىپ جاتقانى تۋرالى تاعى ءبىر حابارلاما كەلىپ تۇسكەن. ساعات 16.45 كەزىندە ۇشىپ شىققان ءدال وسى ان-2 ۇشاعىنىڭ قوزعالتقىشى قىزىپ كەتكەن. كورسەتىلگەن ورىندى تەكسەرگەننەن كەيىن ءتۇتىننىڭ رەسەي تاراپىنان شىعىپ جاتقانى انىقتالعان.
