بۇگىن تۇركىستان وبلىسىنىڭ قۇرىلعانىنا 2 جىل تولدى
وسىعان وراي وبلىس اكىمى ءومىرزاق شوكەيەۆ تۇركىستاندىقتاردى ارنايى قۇتتىقتاپ، ەكى جىلدا ەڭسەرىلگەن جۇمىستارعا توقتالدى، دەپ حابارلايدى قازاقپارات ءتىلشىسى.
ءوڭىر باسشىسى ءوز سوزىندە تۇگەل تۇركى دۇنيەسىنىڭ كوشباسشىسىنا اينالعان نۇرسۇلتان نازاربايەۆتىڭ 2018 -جىلعى 19-ماۋسىمداعى تاريحي تاعىلىمدى جارلىعى تۇركىستاننىڭ تۇلەۋىنە ەرەكشە سەرپىن بەرگەنىن اتاپ ءوتتى. سودان بەرگى 2 جىلدا تۇركىستان وبلىسىنىڭ الەۋمەتتىك- ەكونوميكالىق الەۋەتىنىڭ ارتىپ كەلە جاتقانىن دا تىلگە تيەك ەتتى.
«وسىدان تۋرا ەكى جىل بۇرىن ماۋسىم ايىندا ۇلى تۇركىستان دالاسىندا ۇلكەن جاڭالىق بولعانى بەلگىلى. قازاقستاننىڭ عانا ەمەس، مەن تۇركىستان وبلىسى قۇرىلدى. ەلباسىنىڭ ارقاسىندا تۇركى الەمىنىڭ تەكتى ءتورى تۇركىستان قالاسى ءوڭىر ورتالىعىنا اينالدى. كورەگەن كوشباسشىمىزعا ۇزاق ءومىر، قاجىماس قايرات تىلەپ، بۇكىل تۇركىستاندىقتار اتىنان شىنايى العىسىمىزدى دا جەتكىزگىم كەلىپ وتىر. مەملەكەت باسشىسى قاسىم-جومارت توقايەۆ تا ءوز تاراپىنان جاڭا تۇركىستاننىڭ ورلەۋىنە بارىنشا قولداۋ جاساپ، جان- جاقتى دامۋىن تىكەلەي قاداعالاپ وتىر. تاريحي ولشەممەن قاراساق، بۇل وتە قىسقا ۋاقىت. الايدا اتقارىلعان قىرۋار جۇمىس ناتيجەسىندە تۇركىستاننىڭ جاڭا كەلبەتى، جاڭا بولمىسى قالىپتاسىپ كەلەدى»، - دەدى ءومىرزاق ەستاي ۇلى.
ايماق باسشىسى باستى ماقسات - تۇركىستاندى زامانۋي قالا ەتۋ، ءومىر سۇرۋگە ىڭعايلى، جايلى ەتۋ ەكەنىن اتاپ ءوتتى. وسى باعىتتا كيەلى شاھار ارقىلى «باتىس قىتاي - باتىس ەۆروپا» اۆتوجولى، تەمىر جول وتەدى، جىل سوڭىنا دەيىن ىسكە قوسىلاتىن حالىقارالىق اەروپورت - قالانىڭ ءوسۋ پوتەنتسيالىن تاعى دا ارتتىراتىنى ءسوزسىز.
ايتا كەتەيىك، بۇگىندە تۇركىستان قالاسىندا العاشقى كەزەكتە 175 نىساننىڭ قۇرىلىسى جوسپارلانسا، سونىڭ 102 سى جىل اياعىنا قاراي پايدالانۋعا بەرىلەتىن بولادى. تۇركىستاننىڭ تۋريستتىك، ءبىلىم ورتالىعى رەتىندە دامىتۋ ءۇشىن ارنايى تۋريزم جانە مەيماندوستىق ۋنيۆەرستيتەتى اشىلدى، رۋحاني-مادەني ورتالىق رەتىندە دامىتۋ ءۇشىن 2019 -جىلى 9 الەۋمەتتىك نىسان تاپسىرىلسا، بيىل 20 نىسان قۇرىلىسى اياقتالىپ، ەل يگىلىگىنە بەرىلمەك. جاڭادان قالىپتاسقان وبلىستا جۇمىس ىستەۋگە بۇكىل رەسپۋبليكادان ماماندار كەلىپ جاتىر، ولاردى باسپانامەن قامتۋ ماڭىزدى ماسەلەنىڭ ءبىرى بولىپ وتىر.
«وتكەن جىلى قالادا 1128 وتباسى جاڭا پاتەرگە قونىستانسا، بۇگىنگى كۇنگە ءتۇرلى قارجىلاندىرۋ كوزدەرى ارقىلى 6300 پاتەردى قۇرايتىن 136 كوپقاباتتى ءۇيدىڭ قۇرىلىسى جالعاسۋدا. سوڭعى 2 -جىلدا تۇركىستان وبلىسىنىڭ ەكونوميكاسىنا ءتۇرلى قارجى كوزدەرى باعىتتالعان. ءبىر عانا تۇركىستان قالاسىنا سالىنعان ينۆەستيتسيا كولەمى 160 ميلليارد تەڭگەدەن ارتقان. ءوڭىر اۋىلشارۋاشىلىعى، قۇرىلىس، مادەنيەت، سپورت، ينۆەستيتسيا تارتۋ جانە باسقا سالالاردا دا ناقتىلى ىلگەرىلەۋشىلىكتەرگە جەتىپ وتىر»، - دەدى وبلىس اكىمى.
ءومىرزاق ەستاي ۇلى تولىمدى تابىستاردان بولەك، وبلىستا سوڭعى جىلدارى ءبىرقاتار قيىندىقتار دا ورىن العانىن جاسىرمادى. ارىس جارىلىسى، تولەبي مەن ماقتاارال اۋدانىنداعى سۋ تاسقىنى زارداپتارىن جويۋ جۇمىستارى دا جۇيەلى تۇردە جۇزەگە اسۋدا. بۇل قيىندىقتاردى بىرگە ەڭسەرىپ كەلە جاتقان وبلىس جۇرتشىلىعىنا العىسىن بىلدىرگەن ءوڭىر باسشىسى تۇركىستاندىقتاردى جاڭا تاريحتىڭ جازىلۋىنا ۇلەس قوسۋعا شاقىردى.