قىزىلوردادا جالعان كۋالىك ەتكەن 2 تۇرعىن سوتتالدى
قىزىلوردا. قازاقپارات - قىزىلوردا قالاسىنىڭ ەكى تۇرعىنى قىلمىس جاسالعانى جونىندە وتىرىك ايتقانى ءۇشىن 6 اي مەرزىمگە باس بوستاندىعىن شەكتەۋ جازاسىنا كەسىلدى، دەپ حابارلايدى قازاقپارات ءتىلشىسى.
اتالمىش وقيعا وتكەن جىلدىڭ اقپان ايىندا ورىن العان. قالانىڭ ەكى تۇرعىنى «اكىمدىك وكىلدەرى مەن قۇقىق قورعاۋ ورگاندارىنىڭ قىزمەتكەرلەرى وزدەرىنە كۇش كورسەتىپ، زاڭسىز بوستاندىعىمىزدان ايىردى» دەگەن جەلەۋمەن قىزىلوردا قالالىق پوليتسيا باسقارماسىنا ارىزدانعان.
«قىلمىس جاسالعانى تۋرالى كورىنەۋ جالعان ءسوز جەتكىزگەنى ءۇشىن ولارعا قاتىستى قر قىلمىستىق كودەكسىنىڭ 419-بابى 2-بولىگىمەن سوتقا دەيىنگى تەرگەۋ جۇرگىزىلىپ، ايىپتاۋ اكتىسىمەن سوتقا جولداندى. قىزىلوردا قالاسى №2-سوتىنىڭ ۇكىمى نەگىزىندە ايىپتالۋشىلاردىڭ ءارقايسىسىنا 6 اي مەرزىمگە باس بوستاندىعىن شەكتەۋ جازاسى تاعايىندالدى. ولار پروباتسيالىق باقىلاۋعا الىندى»، - دەپ ءمالىم ەتتى قىزىلوردا وبلىستىق پوليتسيا دەپارتامەنتىنىڭ باسپا ءسوز قىزمەتى.
