ەلوردادا ۇلتتىق قوعامدىق سەنىم كەڭەسىنىڭ 2-وتىرىسى وتەدى
القالى جيىنعا ق ر پرەزيدەنتى قاسىم-جومارت توقايەۆتىڭ قاتىساتىندىعى كۇتىلەدى، دەپ حابارلايدى قازاقپارات ءتىلشىسى.
ەستەرىڭىزگە سالا كەتسەك، 2019-جىلدىڭ 12- ماۋسىمىندا مەملەكەت باسشىسى ق ر پرەزيدەنتى جانىنان ۇلتتىق قوعامدىق سەنىم كەڭەسىن قۇرۋ تۋرالى جارلىققا قول قويدى.
ال 6- قىركۇيەكتە ەلورداداعى تاۋەلسىزدىك سارايىندا قازاقستان پرەزيدەنتى قاسىم-جومارت توقايەۆتىڭ توراعالىعىمەن ۇلتتىق قوعامدىق سەنىم كەڭەسىنىڭ العاشقى وتىرىسى وتكەن ەدى.
كەڭەستىڭ العاشقى وتىرىسىن قورىتىندىلاعان مەملەكەت باسشىسى قاسىم-جومارت توقايەۆ قۇر ۇرانداتپاي ناقتى جۇمىس جاساۋ قاجەتتىگىن ايتقان بولاتىن.
«بۇگىن وتە جاقسى پىكىر الماسۋ، جالپى اڭگىمە ورىن الدى. بارشاڭىزعا ريزاشىلىعىمدى بىلدىرەمىن. جالپى، ۇلتتىق كەڭەس مۇشەلەرىنىڭ ينتەللەكتۋالدىق دەڭگەيى وتە جوعارى. سوندىقتان بۇگىن وتە ءتيىمدى، قىزىقتى ۇسىنىستاردى تىڭدادىق. بۇل ۇسىنىستاردى جالپى مەن قولدايمىن. كەلەشەكتە اماندىق بولسا ءبارىمىز ءبىر ۇجىم بولىپ ىسكە اسىرامىز دەپ ويلايمىن. ءبىزدىڭ ەڭ قۇندى ماقسات - مىندەت، ۇعىم - بۇل ەلىمىز، مەملەكەتتىلىك. ءبارىمىز وتانىمىزدى سۇيەمىز. ءبىراق، جاي ۇراندار تاستاماي، ناقتى قادامدارىمىزدى جاساۋىمىز كەرەك»، - دەگەن ەدى قازاقستان پرەزيدەنتى.
جالپى، ۇلتتىق كەڭەستىڭ قۇرامى بەلگىلى مەملەكەت جانە قوعام قايراتكەرلەرىنىڭ، ساياسي پارتيالار، ۇكىمەتتىك ەمەس سەكتور وكىلدەرىنىڭ قاتارىنان قالىپتاستىرىلادى. قازاقستان رەسپۋبليكاسى پرەزيدەنتى اكىمشىلىگىنىڭ باسشىسى، قازاقستان رەسپۋبليكاسىنداعى ادام قۇقىقتارى جونىندەگى ۋاكىل، قازاقستان رەسپۋبليكاسىنداعى بالا قۇقىقتارى جونىندەگى ۋاكىل، قازاقستان كاسىپكەرلەرىنىڭ قۇقىقتارىن قورعاۋ جونىندەگى ۋاكىل ءوز لاۋازىمدارىنا سايكەس ۇلتتىق كەڭەستىڭ قۇرامىنا كىرەدى. ءتوراعانىڭ شەشىمى بويىنشا ۇلتتىق كەڭەسكە رەسپۋبليكالىق جانە جەرگىلىكتى دەڭگەيدەگى قوعامدىق كەڭەستەردىڭ وكىلدەرى، سونداي-اق وزگە دە ادامدار ەنگىزىلۋى مۇمكىن.
كەڭەس مۇشەلەرىمەن مىنا سىلتەمە ارقىلى تانىس بولا الاسىزدار.
