جاڭقوش تۇراروۆ 2 جىلدىق ۇزىلىستەن كەيىنگى جەكپە-جەگىن ۋەلستە وتكىزەدى
«قازاقستان كاسىپقوي بوكسى» ۆكونتاكتە پاراقشاسىندا جاريالانعانداي، بوكسشىنىڭ كەلەسى ايقاسىنا قاتىستى مەنەدجەرى اسقار سالىقبايەۆ ناقتى داتانى اتاعان. ونىڭ ايتۋىنشا، جاڭقوش 1- ماۋسىم كۇنى ۋەلس استاناسى كارديففەدە كەلەسى ايقاسىن وتكىزەدى. جاڭقوشتىڭ قارسىلاسى الداعى ۋاقىتتا بەلگىلى بولماق.
قازاق بوكسشىسى وسىعان دەيىن 2 جىل بويى ەشكىممەن كەزدەسپەگەن ەدى. ال سوڭعى ايقاسىن 2017-جىلدىڭ 9- قىركۇيەگىندە وتكىزىپ، تورەشىلەردىڭ ءبىراۋىزدان قابىلداعان شەشىمىمەن ارگەنتينالىق برۋنو لەوناردو رومايانى (21-7، 8 ك و) جەڭگەن بولاتىن.
ەسكە سالا كەتسەك، MTK Global مەنەدجەرلىك كومپانياسى قازاقستاندىق كاسىپقوي بوكسشى جاڭقوش تۇراروۆپەن (22-0، 15ك و) كەلىسىمشارتقا وتىرعانىن بۇعان دەيىن حابارلاعان بولاتىنبىز.
«بۇل مەن ءۇشىن كەرەمەت جاڭالىق! MTK Global - الەم بوكسىنداعى ۇزدىك مەنەدجەرلىك كوماندا ەكەنىنە سەنەمىن. ولارمەن بىرگە جۇمىس ىستەۋگە اسىقپىن. كوپتەگەن قازاقستاندىق بوكسشىلار مەن نۇسقاۋشىلاردان MTK Kazakhstan-نىڭ بولاشاعى جارقىن ەكەنىن ەستىگەنمىن. ءتۇبى الەم چەمپيونى اتاناتىنىما سەنىمدى»، - دەدى جاڭقوش تۇراروۆ.