الماتىلىق جۇمىس بەرۋشىلەر الەۋمەتتىك مەديتسينالىق ساقتاندىرۋ قورىنا 2 ميلليارد تەڭگە تولەدى

الماتى. قازاقپارات - الماتى جۇمىس بەرۋشىلەرى مەن كاسىپكەرلەرى تەك قانا شىلدە ايىندا مىندەتتى الەۋمەتتىك مەديتسينالىق ساقتاندىرۋ قورىنا - 2 ميلليارد تەڭگە، ءبىر جىلدا 19 ميلليارد تەڭگە كولەمىندە اقشا اۋداردى، دەپ حابارلايدى قازاقپارات ءتىلشىسى.

ءبىر عانا شىلدە ايىندا الماتىلىق جۇمىس بەرۋشىلەر مەن جەكە كاسىپكەرلەر مىندەتتى مەديتسينالىق الەۋمەتتىك ساقتاندىرۋ قورىنا 2 ميلليارد تەڭگەگە جۋىق سوما اۋداردى.

الماتى اۋدارىمدار سوماسى بويىنشا (%23) قازاقستاندا كوش باستاپ تۇر. استانا ەكىنشى ورىنعا (%12,5) تابان تىرەدى. ءۇشىنشى ورىندا - قاراعاندى وبلىسى (%8,2).

ايتا كەتۋ كەرەك، 2017 -جىلدىڭ 1 -شىلدەسىنەن 2018 -جىلدىڭ 1 -شىلدەسىنە دەيىن الماتىلىق جۇمىس بەرۋشىلەردىڭ سالعان سوماسى 17 ميلليارد تەڭگە بولعان ەدى. وسىلايشا 2018 -جىلدىڭ شىلدەسىندە 2 ميلليارد تەڭگە قوسىمشا ءتۇسىم ءتۇستى.

ال قازاقستان بويىنشا جينالعان تولەم كولەمى 88,9 ميلليارد تەڭگەگە جەتتى. قورعا تۇسكەن قارجىنىڭ بارلىعى ق ر ۇلتتىق بانكىندە ساقتاۋلى.

 م ءا م س قورى مەن ق ر ۇلتتىق بانك اراسىندا سەنىمدى باسقارۋ تۋرالى كەلىسىمگە قول قويىلعان.

ال م ا م س اياسىندا مەديتسينالىق كومەك كورسەتۋ 2020 -جىلدان باستالادى.