ەلباسى 2 مىڭنان استام دومبىراشىنىڭ ونەرىن تاماشالادى
«قازاق ەلى» مونۋمەنتى الدىنداعى الاڭدا 2 مىڭنان استام مۋزىكانتتان قۇرالعان دومبىراشىلار وركەسترى ونەر كورسەتۋدە. وركەستر ديرەجەرى ايتقالي جايىموۆتىڭ جەتەكشىلىگىمەن دومبىراشىلار «كوڭىل اشار» ، «اداي» ، «بالبىراۋىن» ، «ەركە سىلقىم» ، «سارىارقا» كۇيلەرىن ورىندادى.
بەلگىلى بولعانداي، بۇگىنگى شاراداعى ەڭ كىشكەنتاي قاتىسۋىشىنىڭ جاسى جەتىدە، ال ەڭ ۇلكەنى - 75 تە.
جوعارىدا اتالعان بەس كۇيدەن بولەك، كونسەرتكە قاتىسۋشىلار مىنا كومپوزيتسيالاردى ورىندايدى: ن. تىلەنديەۆ - «اتا تولعاۋى» ؛ دايرابايدىڭ كۇيى - «دايراباي» ؛ سۇگىر - «ىڭعايكوك» ؛ قۇرمانعازى - «سەرپەر» ؛ داۋلەتكەرەي - «كوروعلى» ؛ دينا - «16-شى جىل» ؛ ن. تىلەنديەۆ - «ماحامبەت» ؛ داۋلەتكەرەي - «قىز اقجەلەڭ» ؛ قۇرمانعازى - «سارانجاپ» . شارا سوڭىندا ساحناعا «اسىل» توبى جانە كوپشىلىك ءسۇيىپ تىڭدايتىن «مۋزارت» توبى ونەر كورسەتەدى.
ايتا كەتەيىك، ۇلتتىق دومبىرا كۇنىنە ورايلاستىرىلعان كونسەرتكە بەلگىلى مۋزىكانتتار، قوعام جانە مادەنيەت قايراتكەرلەرى قاتىسۋدا. اتاپ ايتقاندا، قۇرمانعازى اتىنداعى قازاق مەملەكەتتىك ۇلتتىق اسپاپتار وركەسترىنىڭ، «وتىرار سازى» فولكلورلىق- ەتنوگرافيالىق ۇلتتىق اسپاپتار وركەسترىنىڭ، استانا قالاسى مەملەكەتتىك اكادەميالىق فيلارمونياسىنىڭ ۇلتتىق اسپاپتار وركەسترىنىڭ، تاتتىمبەت اتىنداعى اكادەميالىق حالىق اسپاپتارى، اقتاۋ قالاسىنىڭ قازاق ۇلتتىق قازاق ۇلتتىق اسپاپتارى وركەسترلەرىنىڭ ارتىستەرى ساحنا تورىندە ونەر كورسەتتى.
سونىمەن قاتار، وسىناۋ اۋقىمدى شارانى وتكىزۋگە ورال، اتىراۋ، اقتوبە، قاراعاندى، كوكشەتاۋ، پاۆلودار، قوستاناي قالالارىنىڭ مۋزىكانتتارى جانە جامبىل وبلىسىنىڭ ارتىستەرى اتسالىستى.
«قازاق ەلى» مونۋمەنتى الاڭىندا كيىز ۇيلەر تىگىلىپ، قولدانبالى ونەر بۇيىمدارىنىڭ كورمەسى جانە ءبىر كۇندىك دومبىرا مۋزەيى اشىلدى.
ەكسپوزيتسياعا كەلۋشىلەر قۇرمانعازى، دينا نۇرپەيسوۆا، احمەت جۇبانوۆ، ماحامبەت وتەمىسوۆ، ءبىرجان سال، ەسباي بالۇستا ۇلى، اقان سەرى، اباي، جامبىل جابايەۆ، قازانعاپ تولەپبەرگەن ۇلى، سۇگىر ءالي ۇلى جانە باسقا دا ۇلى تۇلعالار ويناعان اسپاپتاردى كورە الادى.
