قازاقستان بارىسى : شىمكەنتتىڭ اتىنان تاعى 2 بالۋان قوسىلدى

استانا. قازاقپارات - بيىلعى «قازاقستان بارىسى» تۋرنيرىندە وڭتۇستىك قازاقستان وبلىسىنىڭ اتىنان ىرىكتەلگەن بالۋاندار تۇركىستان وبلىسىنىڭ نامىسىن قورعايتىن بولدى.

وسىعان بايلانىستى، شىمكەنت قالاسىنىڭ اتىنان تۋرنيرگە تاعى ەكى بالۋان قوسىلماق. بۇل جايلى بۇگىنگى استاناداعى ورتالىق كوممۋنيكاتسيالار ورتالىعىندا وتكەن باسپا ءسوز ءماسليحاتىندا «قازاقستان بارىسى» قورىنىڭ ءتوراعاسى ارمان شورايەۆ ءمالىم ەتتى، دەپ حابارلايدى قازاقپارات ءتىلشىسى.

ارمان شورايەۆتىڭ ايتۋىنشا، وسى جىلى «قازاقستان بارىسى» تۋرنيرى 8-شى رەت وتكىزىلەدى.

«پرەزيدەنتتىڭ، كوپ ازاماتتاردىڭ، ۇكىمەتتىڭ، پرەزيدەنت اكىمشىلىگىنىڭ قولداۋىمەن ءوتىپ جاتقان تۋرنيردى ەشقانداي مىنگە جول بەرمەي وتكىزەمىز دەگەن سەنىمدەمىز. تۋرنيردى قولداۋشىلاردىڭ، دەمەۋشىلەردىڭ سانى جىلدان-جىلعا كوبەيىپ كەلەدى. بىرنەشە جىلدان بەرى ءبىزدى قولداپ كەلە جاتقان «Qazaqstan» جانە «Qazsport» ارنالارىنا ريزاشىلىعىمدى بىلدىرگىم كەلەدى. ودان قالدى، ورالبەك بوتپاي سەكىلدى ءبىزدى دەمەپ جۇرگەن ۇلتجاندى ازاماتتارىمىز بار»، - دەدى ارمان شورايەۆ.

ونىڭ ايتۋىنشا، تۋرنيردىڭ جەڭىمپازىنا باس جۇلدەنى پرەزيدەنت تاپسىرادى دەپ كۇتىلۋدە.

«وزدەرىڭىز بىلەتىندەي، بىزدە قازىر رەسپۋبليكالىق ماڭىزى بار قالا قوسىلدى. وسىعان بايلانىستى و ق و اتىنان ىرىكتەۋدەن وتكەن بالۋاندار تۇركىستان وبلىسىنىڭ اتىنان ونەر كورسەتەتىن بولادى. ال رەسپۋبليكالىق ماڭىزى بار جاڭا قالامىزدىڭ بيلىگى شىمكەنتتىڭ دە اتىنان تۋرنيرگە شىعا الاتىنداي بالۋان قوسۋدى ءوتىندى. سوندىقتان، تۋرنيرگە رەگلامەنت ەنگىزىپ، 35 بالۋانىمىزعا تاعى ەكى بالۋان قوسىلدى. ولار شىرايلى شىمكەنتتىڭ نامىسىن قورعايتىن بولادى»، - دەدى ارمان شورايەۆ.

ايتا كەتسەك، قازاقستان رەسپۋبليكاسى تۇڭعىش پرەزيدەنتى جۇلدەسى ءۇشىن، استانانىڭ 20 جىلدىعىنا ارنالعان قازاق كۇرەسىنەن «قازاقستان بارىسى» رەسپۋبليكالىق تۋرنيرى 1- شىلدە كۇنى ەلورداداعى «بارىس ارەنا» مۇز سارايىندا وتەدى. وسىمەن سەگىزىنشى رەت وتەتىن بەدەلدى باسەكەگە ەلىمىزدىڭ 14 وبلىسى، الماتى جانە استانا قالالارىنان جانە اسكەريلەر اراسىندا ىرىكتەۋدەن وتكەن 37 (ەكى بالۋان جاقىندا شىمكەنت قالاسىنان قوسىلىپ وتىر) ۇزدىك بالۋان قاتىسادى. ونىڭ ىشىندە بىلتىرعى تۋرنيردىڭ جەڭىمپازى قاتىسۋشىلار ساپىنا ىرىكتەۋسىز قوسىلدى.

تۋرنير «Qazaqstan» جانە «Qazsport» ارنالارىنان تىكەلەي ەفيردە كورسەتىلەدى.

اتاپ وتەرلىگى، 2011-جىلدان باستاپ «قازاقستان بارىسى» اتاعىن ۇلان رىسقۇل، بەيبىت ىستىبايەۆ، ايبەك نۇعىماروۆ، مۇحيت تۇرسىنوۆ، ەلامان ەرعاليەۆ جەڭىپ العان بولاتىن.

جارىسقا قاتىسۋشى بالۋاندار استاناعا بۇگىن كەلەدى. ال 29- ماۋسىم كۇنى ساعات 19:30-دا رەسمي سالماق ولشەۋ ءراسىمى بەلگىلەنگەن. باس قالانىڭ ىرگەلى ساۋدا ورتالىقتارىنىڭ ءبىرى «حان شاتىردا» تۇيە بالۋاندار مىڭداعان حالىقتىڭ الدىنا شىعادى. ال «قازاقستان بارىسى» تۋرنيرى 1- شىلدە كۇنى ساعات 12:00 كەزىندە باستالىپ، بالۋاندار جەرەبە تارتۋ راسىمىنەن وتەدى. تارتىستى بەلدەسۋ جەتى ساعاتقا سوزىلادى.

ايتا كەتەرلىگى، «بارىس ارەناعا» 11 مىڭعا جۋىق كورەرمەن سيادى. جەتىجىلدىق تاجىريبەگە سۇيەنە وتىرىپ، ۇيىمداستىرۋشىلار «بارىس ارەنانىڭ» لىق تولاتىنىنا سەنىپ وتىر. ءداستۇر بويىنشا جانكۇيەرلەر اراسىندا «Renault Logan»  اۆتوكولىگى ويناتىلادى. بيلەتتەردى «مەلومەن» دۇكەندەر جەلىسىنەن جانە kassir.kz سايتىنان 500 تەڭگەدەن باستاپ 5 مىڭ تەڭگە ارالىعىندا ساتىپ الۋعا بولادى.

«قازاقستان بارىسى» تۋرنيرىنىڭ جۇلدە قورى دا قوماقتى. جەڭىمپاز اتانعان بالۋانعا التىن بەلبەۋ مەن التىننان قۇيىلعان «تايتۇياق» تابىستالادى. ەكىنشى جانە ءۇشىنشى ورىنعا سايكەسىنشە كۇمىس جانە قولا بەلبەۋ تاپسىرىلماق. ءار بەلدەسۋدەگى جەڭىس ءۇشىن بالۋاندار 100 مىڭ تەڭگەنى قانجىعاسىنا بايلايدى.   Ⅲ ورىن العان بالۋانعا 1,8 ميلليون تەڭگە، ال ونىڭ باپكەرىنە 900 مىڭ تەڭگە تابىستالادى. ال Ⅱ ورىن ءۇشىن 5,5 ميلليون تەڭگە، ونىڭ باپكەرىنە 1,8 ميلليون تەڭگە بەرىلمەك. تۋرنيردە توپ جارعان ءبىرىنشى ورىن يەگەرى 25 ميلليون تەڭگەگە يە بولادى. ال ونىڭ باپكەرىنە 3,5 ميلليون تەڭگە تاپسىرىلادى.