كوكشەتاۋلىقتار 2 جىل بۇرىن جوعالعان تاستى قازىپ الدى - كەسكىن
قالانىڭ سيمۆولىنا اينالعان تاستى جەر استىنان الىپ شىعۋ وقيعاسىن الەۋمەتتىك جەلى قولدانۋشىلار قىزۋ تالقىلاۋدا، دەپ حابارلايدى قازاقپارات ءتىلشىسى.
ەسكە سالا كەتەيىك، كوكشەتاۋدىڭ سيمۆولىنا اينالعان تاستىڭ جوعالۋىنا قاتىستى وقيعا 2015 -جىلدىڭ جازىندا ورىن العان بولاتىن.
سول كەزدە قالانىڭ ورتالىق كوشەلەردىڭ ءبىرى - اباي اتىنداعى داڭعىلدا جوندەۋ جۇمىستارى جۇرگىزىلدى. وسى كوشەنىڭ بويىندا ورنالاسقان «كوكشەتاۋ» قوناق ءۇيىنىڭ الدىنداعى الاڭدى اباتتاندىرۋ كەزىندە مەردىگەر فيرما قۇرىلىسشىلارى كەشكۇرىم «1824» داتاسى ويىپ جازىلعان الىپ تاستى جەرگە كومىپ تاستايدى. ۇستىنە اسفالت توسەپ اۆتوتۇراققا اينالدىرادى. بۇل تاستا جازىلعان داتا قالانىڭ ىرگەسى قالانعان جىلدى بىلدىرەدى.
كەيىن ونىڭ اياق استى جوعالىپ كەتۋىنە بايلانىستى تۇرعىندار ءتۇرلى پىكىر ءبىلدىردى. كەيبىرى قالانىڭ سيمۆولىنا اينالعان تاستى سول تۇرعان جەرىنە كومىپ تاستاعان مەردىگەر ۇيىم مەن وعان جول بەرگەن قالا باسشىلىعىن سىنعا السا، ەندى ءبىرى بۇل شەشىمدى دۇرىس دەپ قولدادى. ءتىپتى، جەرگىلىكتى جوعارى وقۋ ورىندارىنىڭ عالىمدارى تاستىڭ اينالاسى رادياتسياعا تولى دەگەن پىكىر ايتتى.
الايدا، اراعا 2 جىل سالىپ الىپ تاس جەردىڭ بەتىنە شىعارىلدى. وعان الەۋمەتتىك جەلىدە تاراعان بەينە جازبا ايقىن دالەل. ازىرگە تاستىڭ قايدا قويىلاتىنى بەلگىسىز.
🍂🍁🍂🍁 @kokshevideogram #кокшевидеограмкамень
