ءوز قىزىنىڭ تويىنا 2 ميلليون دوللار جۇمساعان سۋديا اقشانى قايدان العانىن ايتتى
استانا. قازاقپارات - ر ف كراسنودار سوتىنىڭ اكىمشىلىك ۇجىمىنىڭ ءتورايىمى ەلەنا حاحاليەۆا قىزىنىڭ ەكى ميلليون دوللار جۇمسالعان تويىنا كىمنىڭ شىعىندالعانىن ايتىپ بەردى، - دەپ حابارلايدى Life.ru.
سۋديا 2016 -جىلعى مۇلىك دەكلاراتسياسى بويىنشا ءبىر جىلدا 2 ميلليون 641 مىڭ رۋبل عانا (ايىنا 220 مىڭ رۋبل) تابىس تاپقان. ەلەنا حاحاليەۆانىڭ ءتۇسىندىرۋى بويىنشا، تويدى ۇيىمداستىرۋمەن بۇرىنعى كۇيەۋى اينالىسقان.
«دەكلاراتسيادا بۇرىنعى كۇيەۋىم تۋرالى مالىمەت جوق، ءبىز اجىراسقانبىز، ونى كورسەتۋىم مىندەتتى ەمەس. قالاي بولسا دا، ول اكە. قىزىمنىڭ تويىن ۇيىمداستىرۋمەن تولىق اينالىسقان سول. ول ايتارلىقتاي ءىرى كاسىپكەر. ەكى ميلليون دوللار دەگەن بوس ءسوز، كوكتەن الىپ ايتا سالعان. ەشكىم "بەنتلي" سىيلاعان جوق، ال جۇلدىزدار قوناق رەتىندە كەلدى»، - دەيدى حاحاليەۆا جەرگىلىكتى باسىلىمداردىڭ بىرىنە بەرگەن سۇحباتىندا.
سۋديانىڭ سوزىنشە، بۇرىنعى كۇيەۋ گرۋزيالىق. رەسەيدىڭ اتاقتى جۇلدىزى يوسيف كابزونمەن ۇزاق جىلدان بەرى دوس. ال كۇيەۋىنىڭ تابىسى تولىقتاي زاڭدى جانە سالىق تولەنەدى. «ال تاراتىلعان مىنا وسەكتى سۋدياعا دەگەن اشىق قىسىم دەپ تۇسىنەمىن»، - دەيدى ول.
ايتا كەتەيىك، مۇنىڭ الدىندا رەسەيلىك ب ا ق كراسنودار قالاسىنىڭ سۋدياسى قىزىنىڭ ۇزاتۋ تويىنا ەكى ميلليون دوللار جۇمساعانىن جازعان. تويدى ەسترادا جانە وپەرالىق اندەر ايتاتىن جۇلدىز نيكولاي باسكوۆ جۇرگىزگەن. سونىمەن بىرگە، ۆالەري مەلادزە، ۆەرا برەجنەۆا جانە يوسيف كوبزون سياقتى جۇلدىزدار ءان سالعان. جۇلدىزداردى تويعا شاقىرۋعا 115 مىڭ ەۋرو جۇمسالعانى دا ايتىلعان ەدى.
