اتامقۇلوۆ «قازسات-2» جەر سەرىگىندەگى اقاۋدىڭ سەبەپتەرىن اتادى

استانا. قازاقپارات - كەشە ماجىلىستەگى ۇكىمەت ساعاتىندا ق ر قورعانىس جانە ايەروعارىش ونەركاسىبى ءمينيسترى بەيبىت اتامقۇلوۆ «KazSat-2» جەر سەرىگى جۇمىسىنداعى اقاۋعا بايلانىستى سەبەپتەردى اتادى، دەپ حابارلايدى قازاقپارات.

«بۇعان اۋىر بولشەكتەر ىقپال ەتتى. اتاپ ايتقاندا، سپۋتنيكتىڭ نەگىزگى ۋاقىتى عارىش كەڭىستىگىندە وتەدى، وسى ورايدا ءتۇرلى بولشەكتەر مەن جوعارى جانە تومەن تەمپەراتۋرالاردىڭ اسەرى بولادى. مامانداردىڭ تاجىريبەسى مەن جۇمىسىنىڭ ارقاسىندا سپۋتنيكتى ورنىنا قويدىق. وسى كەزەڭدە الەمدە ءتورت جەر سەرىگى شىعىپ قالدى، جۇمىسىندا اقاۋ بايقالدى. كۇندەگى جارقىل، سونداي- اق اتالعان بولشەكتەر اپپاراتتىڭ جۇمىسىنا ىقپال ەتتى»، - دەدى مينيستر.

 سونىمەن قاتار اتامقۇلوۆ كيبەرشابۋىلدار جونىندەگى قاۋەسەتتى جوققا شىعاردى. ونىڭ سوزىنشە، «KazSat-2» جانە «KazSat-3» سپۋتنيكتەرى اۆتونومدى تۇردە جۇمىس ىستەپ جاتىر.

«ءاربىر وپەراتوردىڭ ءوزىنىڭ ارنايى ءبىر- نۇكتەسى، لوگينى مەن قۇپياءسوزى بار. باسقارۋ جۇيەسى ينتەرنەتپەن ءوزارا بايلانىستى ەمەس، ياعني جۇيەگە كىرۋ ءۇشىن ءاربىر وپەراتور بويىنشا ءار ءىس- قيمىلعا ارنايى لوگين قاجەت. وسىنداي قورعانىس جۇيەسى سپۋتنيكتى قۇراستىرۋ كەزىندە ەسكەرىلدى. سوندىقتان ينتەرنەتكە قوسىلماعاندىقتان، كيبەرشابۋىلدار ونى باسقارۋعا اسەر ەتە المايدى» ، - دەدى مينيستر.

ەستەرىڭىزگە سالا كەتەيىك، 2017 -جىلدىڭ 31 - ناۋرىزىندا استانا ۋاقىتىمەن ساعات 08:22-دە «KazSat-2» سپۋتنيگىنىڭ قازاقستاندىق جەرءۇستى وپەراتورلارىنىڭ سيگنالى ناشارلادى.

اۆتور: رۋسلان عابباسوۆ