قازسات-2 جەرسەرىگىن باسقارۋ ۋاقىتشا مۇمكىن ەمەس
بۇگىن استانا ۋاقىتى بويىنشا ساعات 08:22-دە «KazSat-2» عارىش اپپاراتى جۇمىسىندا شتاتتان تىس جاعدايى انىقتالدى. وسىنىڭ سالدارىنان «OTAU TV» جەرسەرىكتىك تەلەحابار تاراتۋ جەلىسىندەگى انالوگتىق ەفير جەلىسى مەن «قازاقستاننىڭ» وبلىستىق ارنالارىنىڭ تاراتقىش جەلىسىندە تەلەراديوباعدارلامالار تاراتۋدا كەدەرگىلەر تۋىندادى.
«قازتەلەراديو» ا ق تاراپىنان تەلەراديوباعدارلامالار قابىلداۋدى «KazSat-3» جەرسەرىگىنەن انالوگتىق تاراتۋ جەلىسىنە اۋىستىرۋ بويىنشا جەدەل جۇمىستار جۇرگىزىلىپ جاتىر. قازىرگى ۋاقىتتا وبلىستىق ماڭىزى بار قالالار مەن اۋدان ورتالىقتارىنىڭ كوبىندە تەلەراديوارنالاردىڭ انالوگتىق تارالۋى تولىعىمەن قالپىنا كەلتىرىلدى. قالعان اۋدان ورتالىقتارىندا حابار تاراتۋدى قالپىنا كەلتىرۋ جۇمىستارى بىرنەشە ساعاتتىڭ ىشىندە اياقتالادى.
«قازاقستاننىڭ» وبلىستىق ارنالارىنىڭ اۋدان ورتالىقتارى مەن اۋىلدىق وكرۋگ دەڭگەيىندە انالوگتىق ەفير جەلىسىندە، سونىمەن قاتار «OTAU TV» جەرسەرىكتىك تەلەحابار تاراتۋ جەلىسى ارقىلى تارالۋى «KazSat-2» جەرسەرىگى جۇمىسى قالپىنا كەلگەنىنەن كەيىن جۇزەگە اسىرىلادى. «KazSat-2» جەرسەرىگى جۇمىسىن قالپىنا كەلتىرۋ شارالارىن «رەسپۋبليكالىق عارىش بايلانىسى ورتالىعى» اتقارۋدا.
