الماتى وبلىسىنىڭ 2 ميلليونىنشى تۇرعىنى دۇنيەگە كەلدى
جاس وتباسىنى ءوڭىر باسشىسى اماندىق باتالوۆ ارنايى بارىپ قۇتتىقتاپ، ەكى بولمەلى پاتەردىڭ كىلتىن تابىس ەتتى، دەپ حابارلايدى قازاقپارات ءتىلشىسى.
جەتىسۋ جەرىنىڭ 2 ميلليونىنشى تۇرعىنى ەڭبەكشى قازاق اۋدانىندا دۇنيە ەسىگىن اشتى. ءسابيدىڭ سالماعى - 3 كەلى 700 گرام. «ۇلىستىڭ ۇلى كۇنى الماتى وبلىسىندا ەكى ميلليونىنشى تۇرعىننىڭ ومىرگە كەلۋىمەن باستالىپ وتىر. ءسابيدىڭ جارىق دۇنيەگە كەلۋى - وتباسى ءۇشىن ءارقاشان ەرەكشە قۋانىش، ال وبلىستىڭ ەكى ميلليونىنشى تۇرعىنىنىڭ ومىرگە كەلۋى - ءوڭىرىمىز ءۇشىن ەرەكشە تاريحي وقيعا. سوندىقتان سىزدەردى ۇلكەن قۋانىشتارىڭىزبەن شىن جۇرەكتەن قۇتتىقتايمىن. كىشكەنتاي نارەستەمىز تاۋەلسىز ەلىمىزدىڭ بەتكە ۇستار ازاماتى بولسىن. شاڭىراقتارىڭىزدان شاتتىق پەن باق- بەرەكە كەتپەسىن. ەلىمىز امان بولىپ، حالقىمىزدىڭ سانى كوبەيە بەرسىن»، دەپ وبلىس اكىمى اماندىق باتالوۆ جاس وتباسىنا ەكى بولمەلى پاتەردىڭ كىلتىن تابىس ەتتى.
جاس ءسابيدىڭ اناسى جارقىناي ەمەناقىنوۆا قۋانىشتارىندا شەك جوق ەكەنىن جەتكىزدى.
«ءبىزدىڭ وتباسى ءۇشىن بۇگىن ەرەكشە كۇن، ەكىنشى ءسابيىم دۇنيەگە كەلىپ، وبلىسىمىزدىڭ ەكى ميلليونىنشى تۇرعىنى دەگەن اتقا يە بولىپ جاتىر. وتە باقىتتىمىز، قۋانىشىمىز قۋانىشقا ۇلاسىپ جاتىر. وتباسىمنىڭ اتىنان انا مەن بالاعا، دەنى ساۋ ۇرپاق دۇنيەگە اكەلۋگە بارلىق جاعدايدى جاساپ وتىرعان مەملەكەت باسشىسىنا زور العىسىمدى بىلدىرەمىن. ءسابيلى بولۋمەن قاتار ءۇيلى دە بولىپ جاتىرمىز.
«ءار بالا ءوز نەسىبەسىمەن تۋادى» دەگەندى بابالارىمىز بەكەر ايتپاعان. ەلىمىزدىڭ، جەتىسۋ ولكەسىنىڭ دامىپ، گۇلدەنۋىنە شىن جۇرەكتەن تىلەكتەسپىن. وسىنداي قۋانىشتى ساتتە سىزدەن، اماندىق عابباس ۇلى، جاس سابيىمىزگە ات قويۋىڭىزدى سۇرايمىن»، - دەدى باقىتتى انا وبلىس اكىمىنە قاراتا.
وبلىس اكىمى اماندىق باتالوۆ الماتى وبلىسىنىڭ ەكى ميلليونىنشى تۇرعىنىنىڭ ەسىمىن «نۇرسۇلتان» دەپ قويدى.
الماتى وبلىسىنىڭ ەكى ميلليونىنشى تۇرعىنى مۇعالىمدەر وتباسىندا دۇنيەگە كەلدى. نارەستەنىڭ اكەسى - شورمانوۆ دياس نۇراحمەت ۇلى، اباي اتىنداعى قازاق مەملەكەتتىك ۋنيۆەرسيتەتىنىڭ تۇلەگى، قازىرگى كەزدە ەڭبەكشى قازاق اۋدانىنداعى و. جاندوسوۆ اتىنداعى ورتا مەكتەپتە ديرەكتوردىڭ ورىنباسارى بولىپ قىزمەت جاسايدى.
اناسى - ەمەناقىنوۆا جارقىناي نامازباي قىزى، قازاق مەملەكەتتىك پەداگوگيكالىق ۋنيۆەرسيتەتىنىڭ تۇلەگى، بۇگىنگى كۇنى ەسىك گۋمانيتارلىق كوللەدجىندە پسيحولوگيادان ساباق بەرەدى.
اۆتور: سامال قابىشەۆا
