الداعى 2 جىلدا ەل ىشىندەگى مىڭنان اسا اۋىل ينتەرنەتكە قوسىلادى
استانا تورىندە IT پارك بوي كوتەرەدى. سالانىڭ ىشكى جالپى ونىمدەگى ۇلەسى 4,7 پايىزعا دەيىن وسىرىلەدى. وسى جانە وزگە دە مىندەتتەر بۇگىن «نۇر وتان» پارتياسىندا وتكەن ارنايى كوميسسيا وتىرىسىندا ايتىلدى. جاھاندىق ەكونوميكانىڭ اياق الىسى تەحنولوگيالىق جاڭاشىلدىققا تاۋەلدى. ەلباسى ۇندەۋدە ساياسي مودەرنيزاتسيانى، جولداۋدا ەكونوميكانى تەحنولوگيالىق جەدەل جاڭعىرتۋدى تاپسىردى. «نۇر وتان» پارتياسى ءتوراعاسىنىڭ ءبىرىنشى ورىنباسارى مۇحتار قۇل- مۇحاممەد ساندىق تەحنولوگيالاردى ەنگىزۋدە ۇيىمشىلدىق قاجەتتىگىن اتاپ ءوتتى.
مۇحتار قۇل- مۇحاممەد، «نۇر وتان» پارتياسى ءتوراعاسىنىڭ ءبىرىنشى ورىنباسارى:
- ەلباسىمىز ءوز جولداۋىندا تەحنولوگيالىق جاڭعىرتۋدى جەدەلدەتۋ مەن سيفرلى تەحنولوگيانىڭ تۇتاس يندۋسترياسىن قالىپتاستىرۋدى العا قويىپ، ۇكىمەتكە «سيفرلى قازاقستان» باعدارلاماسىن جاساۋدى تاپسىردى. ءبىزدىڭ ەندىگى ماقساتىمىز وسى جوعارى تەحنولوگيانى بۇكىل ەلىمىزدىڭ جانە ءاربىر قازاقستاندىقتىڭ يگىلىگىنە اينالدىرۋ بولۋى ءتيىس. «سيفرلى قازاقستان» جوبالارىنىڭ دەنىن بيۋدجەتكە يەك ارتا بەرمەي، ينۆەستورلاردىڭ قاراجاتىنا جۇزەگە اسىرۋ مىندەتى تۇر.
3 جىلدا حالىقتىڭ ساندىق ساۋاتى 80 پايىزعا ارتۋى ءتيىس. ەلەكتروندىق ساۋدا، لوگيستيكا ساندىق تۇرعىدا دامىسا، حالىقارالىق قارجى ورتالىعى نەگىزىندە ەلوردادا جاڭا IT پارك اشىلۋى ءتيىس. كرەاتيۆتى قوعام قۇرۋ، ياعني كاسىبي شەبەر ماماندار دايارلاۋ جوسپارى تاعى بار. اۋىل- ايماقتى عالامتورمەن قامتۋمەن بىرگە پرواكتيۆتى مەملەكەتكە كوشۋ ۇلكەن ءىس.
داۋرەن ابايەۆ، ق ر اقپارات جانە كوممۋنيكاتسيالار ءمينيسترى:
- ەلەكتروندىق جانە موبيلدىك ۇكىمەتتى ودان ءارى دامىتۋ ارقىلى مەملەكەتتىك ورگانداردىڭ قولجەتىمدىلىگىن جاڭا دەڭگەيگە كوتەرۋدى كوزدەيدى. بيۋدجەتتىك باعدارلامالاردىڭ جوبالارىن قوعامدا اشىق تالقىلاۋ. مەملەكەتتىك قىزمەتتەردى الۋدى جەڭىلدەتىپ، ولاردى ەلەكتروندى فورپماتتاعى تۇرلەرىن كوبەيتۋ بويىنشا شارالار اتقارىلادى. ەلىمىزدە 710 مەملەكەتتىك قىزمەتتىڭ 77 پايىزى ەلەكتروندىق ۇكىمەت، مەملەكەتتىك كورپوراتسيا ارقىلى كورسەتىلگەن.
ءماجىلىس دەپۋتاتتارى ساندىق سالا بويىنشا ساۋالدارىن قويىپ، ۇسىنىستارىن دا ايتتى.
باقىتجان ءابدىرايىموۆ، ق ر پارلامەنتى ءماجىلىسىنىڭ دەپۋتاتى:
- مىسالى، شەتەلدە جاڭا تەحنولوگيالار شىعىپ جاتىر. ادام كوزىن سۋرەتكە ءتۇسىرىپ دارىگەرگە جىبەرەدى. دارىگەر قارايدى دا كونسۋلتاتسياسىن بەرە الادى. وسىنداي باعىتقا كوشۋ كەرەك.
ابىلايحان وسپانوۆ، «ازاماتتارعا ارنالعان ۇكىمەت» مەملەكەتتىك كورپوراتسياسى باسقارماسىنىڭ ءتوراعاسى:
- بولاشاقتا ءتىپتى نارەستە تۋىلعان سوڭ اناسىنىڭ تەلەفونىنا قۇتتىقتاۋ جولدانىپ، بالانىڭ ەسىمىن سۇراعان حابارلاما جىبەرىلەدى. ول ەسىمىن، اكەسىنىڭ اتىن جازسا، كۋالىك بەرۋ، بالاباقشاعا كەزەككە تۇرۋ، جاردەماقى ماسەلەلەرىن ورتالىق بىردەن شەشىپ بەرەدى. زەينەتكە شىققان كەزدە دە تۋرا سولاي. قانشا زەينەتاقى الاتىنىنا دەيىن تەلەفونعا اقپارات كەلۋى ءتيىس. بۇل قيال ەمەس، اقيقات، ءبىراق ۋاقىت كەرەك.
دەمەك، تەحنولوگيا وربىسە، ءومىر جەڭىلدەيدى دەگەن ءسوز. قازاقستان 1600 مەملەكەتتىك قىزمەتتى ونلاين رەجيمدە كورسەتەتىن سينگاپۋردىڭ دەڭگەيىنە جەتكىسى كەلەدى. اسىرەسە انىقتاما الامىن دەپ اۋدانعا اعىلاتىن اۋىلداعى اعايىننىڭ سابىلىسى ازاياتىن ءتۇرى بار. وعان «قازپوشتا» بولىمشەلەرى سەپتەسپەك.
www.khabar.kz
