ديماش قۇدايبەرگەنوۆ قىتايدا ءوتىپ جاتقان ءان بايقاۋىنىڭ 2-كەزەڭىن دە جەڭدى - فوتو، كەسكىن

جەرلەسىمىز ديماش قۇدايبەرگەنوۆ بۇل جولى دا ەرەكشە شەبەرلىگىمەن بارشانى تاڭعالدىرىپ، بۇل كەزەڭنىڭ باس جۇلدەسىن قانجىعاسىنا بايلادى. ديماش ەكىنشى كەزەڭدە ءتورتىنشى بولىپ ونەر كورسەتتى. بۇعان دەيىن حابارلاعانىمىزداي، جەرلەسىمىز رەسەيلىك ورىنداۋشى ۆيتاستى بارشا الەمگە تانىتقان «وپەرا №2» ءانىن ورىندادى.
ءاندى ۆيتاستىڭ داۋىسىنان 4 مودۋلياتسيامەن 2 تون جوعارى ورىنداعان ديماشتىڭ شەبەرلىگىنە كورەرمەندەر عانا ەمەس، جوباعا قاتىسۋشى انشىلەردىڭ ءوزى تاڭدانىستارىن جاسىرا المادى. ديماش قۇدايبەرگەنوۆكە بايقاۋدا قولداۋ ءبىلدىرۋ ءۇشىن قازاقستاننان اكەسى باردى. ساحناداعى ءساتتى ونەرىنەن كەيىن اكەسىن بارىپ قۇشاقتاعان ديماشقا جينالعان جۇرت جىلى شىراي ءبىلدىرىپ، شاپالاقتارىن ۇدەتە ءتۇستى.
ايتا كەتەرلىگى، قىتايدا بۇعان دەيىن وسىنداي ەرەكشە داۋىسىمەن ۆيتاستىڭ ەسىمى بەلگىلى بولاتىن. ال ديماش ءوزىن ۆيتاسپەن سالىستىرماۋدى وتىنگەن ەدى. ءاندى وزىندىك ستيلمەن ورىنداعان ديماشتى، قىتايلىق كورەرمەندەر ادامزات داۋىسىنىڭ عاجابى جانە ەڭ شەگى دەپ باعالاپ وتىر.
ديماش جوبانىڭ ءبىرىنشى كەزەڭىندە فرانتسۋزداردىڭ ەڭ قيىن كومپوزيتسيالارىنىڭ ءبىرى ايگىلى «SOS d'un terrien en détresse» ءانىن ورىنداعان بولاتىن.
اۆتور: مۇحتار قاليموللا ۇلى