قىرعىزستاندا اپاتقا ۇشىراعان بوينگ ۇشقىشى ۇشاقتى 2 رەت قوندىرماق بولعان
بۇل جايىندا قازاقپاراتتىڭ بىشكەكتەگى ارناۋلى ءتىلشىسى ماديبەك جانىبەكوۆ حابارلادى.
قازاقپارات تىلشىسىنە قىرعىزستاننىڭ ازاماتتىق اۆياتسيا اگەنتتىگى باسشىسىنىڭ ورىنباسارى باقىت جۋنۋشاليەۆ بوينگ ۇشاعىنىڭ قالاي اپاتقا ۇشىراعانىن ايتىپ بەرگەن.
«بوينگ شىعىستان باتىسقا قاراي قونۋعا بەت العان. ءبىراق، ونىڭ قانداي سەبەپتەرمەن جولدان شىعىپ كەتكەنى تەرگەۋدەن كەيىن عانا انىقتالادى. ۇشقىش ەكىنشى مارتە اينالىپ كەلىپ قونباق بولعان دەگەن بولجام جاساۋعا بولادى. نەلىكتەن بۇل ونىڭ قولىنان كەلمەدى؟ ءبىز ۇشقىشتىڭ قالاي ارەكەت جاساعاندىعىن جانە قانداي شەشىم قابىلداعاندىعىن بىلمەيمىز»، - دەدى ول.
سونىمەن قاتار اگەنتتىك باسشىسىنىڭ ورىنباسارى ۇشاق قۇلاعان جەردە اپاتتىق قۇتقارۋ جۇمىستارى جالعاسىپ جاتقاندىعىن ايتتى.
«ءبىزدىڭ ماماندار ازىرشە ۇشاقتىڭ قۇلاۋ سەبەبىن تەرگەۋگە كىرىسە المايدى. سوندىقتان ەشقانداي رەسمي نۇسقا ايتا المايمىز. رەيس تازا كوممەرتسيالىق بولاتىن. ول گونكونگتەن بىشكەك ارقىلى ىستانبۇلعا بارۋى ءتيىس ەدى. ۇشۋ 4+1 سىزباسى بويىنشا ورىنداعان. ياعني، ەكيپاجدىڭ 4 مۇشەسى مەن 1 الىپ ءجۇرۋشى بولعان. ءبىز بورتتا الىپ ءجۇرۋشى ادامنىڭ بولعان- بولماعاندىعىن دا بىلمەيمىز»، - دەدى جۋنۋشاليەۆ.
ايتا كەتەيىك، 16-قاڭتاردا ساعات تاڭعى 7.31 دە بىشكەكتىڭ داچا-سۋۋ اۋىلىندا، اۋەجايعا جاقىن جەردە گونكونگتەن تۇركياعا بەت العان Boeing 747-400 جۇك ۇشاعى قۇلادى. اۆيالاينەر «ماناس» اۋەجايىنان ماي قۇيۋدى جوسپارلاعان. 23 ءۇي قيراپ، 37 ادام قازا تاپتى.
اۆتور: مارلان جيەمباي
