ەرمەكبايەۆ ءدىني ەكسترەميزم مەن تەرروريزمنىڭ الدىن الۋ جۇمىستارىن 2 باعىتتا جۇرگىزبەك
دەپ حابارلايدى قازاقپارات.
«ءدىن سالاسىنداعى كوپتەگەن ۆەدومستۆولاردىڭ جۇمىسىن ۇيلەستىرۋ ءۇشىن ۇكىمەت جانىنان ۆەدومستۆوارالىق كوميسسيا قۇرىلاتىن بولادى. وسى ورايدا مينيسترلىك ءدىندى تەرىس ماقساتتارعا پايدالانۋعا ۇمىتىلاتىن كەز كەلگەن ارەكەتكە جول بەرمەۋ جانە جولىن كەسۋ ءۇشىن بارلىق شارالاردى قابىلدايتىندىعىن اتاپ ايتقىم كەلەدى»، - دەدى ول.
ونىڭ ايتۋىنشا، ءدىني ەكسترەميزم مەن تەرروريزمنىڭ الدىن الۋ جۇمىستارى نەگىزگى 2 باعىتتا، اتاپ ايتقاندا جالپى پروفيلاكتيكا جانە ماقساتتى رەابيليتاتسيالاۋ جۇمىستارى ارقىلى جۇرگىزىلەتىن بولادى.
«جالپى پروفيلاكتيكا قوعامدا ءدىني ەكسترەميستىك يدەولوگيانى جاقتىرماۋ احۋالىن قالىپتاستىرۋدى، دىنگە قىزىعۋشىلىق تانىتاتىن تۇرعىنداردىڭ ساۋاتىن كوتەرۋدى كوزدەيتىن بولادى. ال ماقساتتى رەابيليتاتسيا، ياعني وڭالتۋ تاۋەكەل توپتار مەن ەكسترەميستىك اعىمداردىڭ يدەولوگيالارىنا ەرىپ كەتكەن ادامداردى تەولوگيالىق تۇرعىدان ءداستۇرلى سەنىمگە قايتارۋ ماقساتىندا جەكە جۇمىستار جۇرگىزۋ ارقىلى ىسكە اسىرىلادى. بۇل باعىتتاعى شارالار بارىسىندا ىشكى ىستەر مينيسترلىگىنىڭ تۇزەۋ مەكەمەلەرىندە، ياعني كولونيالاردا جازالارىن وتەۋشىلەرگە ەرەكشە نازار اۋدارىلادى»، - دەدى ەرمەكبايەۆ.
اۆتور: مارلان جيەمباي
