كەرەمەت شاش ۇلگىسى بار 2 ايلىق ءسابي ادامداردى تاڭقالدىرۋدا - فوتو

استانا. قازاقپارات - دجۋنيور كوكس-نۋنۋدىڭ ومىرگە كەلگەنىنە توعىز اپتا ەندى عانا بولسا دا، ونىڭ شاشتارى ۇزىن بولىپ ءوسىپ ۇلگەرگەن.

بۇل تۋرالى Daily Mail حابارلايدى.

اناسى چەلسي بالانى ءار شومىلدىرعان سايىن شاشتارىن كەپتىرىپ بەرۋگە ءماجبۇر. ال ونى ەرتىپ دۇكەنگە بارا قالار بولسا ەكى ەسە ۋاقىتىن جۇمسايدى. ويتكەنى الدىنان كەزدەسكەن ادامنىڭ بارلىعى ادەيىلەپ توقتاپ، ولاردى سوزگە تارتۋعا قۇمار.

 

قازىردىڭ وزىندە وسىنداي شاشقا يە بالا، ەكى جىلدان سوڭ قانداي بولۋى مۇمكىن دەگەن ساۋالدىڭ تۋىنداۋى دا زاڭدى.

 

برايتون قالاسىندا ومىرگە كەلگەن دجۋنيوردىڭ سالماعى 4,5 كەلى بولعان. دارىگەرلەر ونى ءتىپتى "قونجىق" دەپ اتاپتى. ال 32 جاستاعى اناسى شاشتاراز بولىپ جۇمىس ىستەيدى.

 

«كوپ ادام بالانىڭ شاشىن قيىپ تاستايسىڭ با دەپ سۇرايدى، نەمەسە سولاي ىستەۋگە كەڭەس بەرەدى. الايدا مەن ونىڭ وسىلاي قالعانىن قالايمىن. ءبارىبىر ونىڭ ءتۇرى ەرەكشە»، - دەيدى اناسى.

 قازىر دجۋنيوردىڭ شاشى ازايماي، كەرىسىنشە كۇننەن كۇنگە ءوسىپ كەلەدى.

ايتپاقشى، چەلسي جۇكتى كەزىندە ءجيى اسقازان قىجىلىمەن اۋىرعان. وسى جەردە ەگەر ىشتەگى ۇرىقتىڭ شاشى وسە باستاسا، وندا اناسىندا قىجىل پايدا بولادى دەگەن حالىق دانالىعى دا ەسكە تۇسەدى.