اتىراۋداعى بەكىرە وسىرەتىن 2 زاۋىتقا دا كۇردەلى جوندەۋ قاجەت
«اتىراۋ قالاسىنداعى بەكىرە بالىعىن وسىرەتىن ەكى زاۋىت ەسكىرگەن تەحنولوگيا بويىنشا جۇمىس ىستەيدى. سوندىقتان كۇردەلى جوندەۋ جانە قايتا جاڭعىرتۋدى قاجەت ەتەدى. سونىمەن بىرگە بەكىرە بالىقتارىنىڭ تابيعي ءونىمىن مولايتۋ ءۇشىن جاعداي جاساۋ قاجەت. سول سەبەپتى جايىق- كاسپي باسسەينىندە بالىقتاردىڭ ۋىلدىرىق شاشۋعا قونىس اۋدارۋىن قامتاماسىز ەتۋ ءۇشىن بالىق ءوتۋ ارنالارىن جىل سايىن تازارتىپ وتىرۋ، اتىراۋ جانە باتىس قازاقستان وبلىستارىنىڭ اۋماقتارى ارقىلى وتەتىن جايىق وزەنىنىڭ جايىلماسىنداعى بەكىرە بالىقتارى ۋىلدىرىق شاشاتىن ورىنداردى قالپىنا كەلتىرۋدى قامتاماسىز ەتۋ كەرەك»، - دەدى نىسانبايەۆ.
ونىڭ سوزىنە قاراعاندا، بۇل ماسەلە وسى جىلدىڭ تامىز ايىندا ۇكىمەت باسشىسىنىڭ اتىراۋ وبلىسىنا جاساعان ساپارى بارىسىندا تالقىلانعان.
«قازىرگى كەزدە جايىق- اتىراۋ بەكىرە بالىق ءوسىرۋ زاۋىتىن قايتا جاڭارتۋ جوباسىنىڭ تەحنيكالىق- ەكونوميكالىق نەگىزدەمەسىن تۇزەتۋ اياقتالدى جانە وسى تەن بويىنشا قىركۇيەك ايىندا سۇراۋ سالۋ تۇرىندە قوعامدىق تىڭداۋ اياقتالدى. مەملەكەتتىك ساراپتامادان وتكەننەن كەيىن جايىق- اتىراۋ بەكىرە بالىق ءوسىرۋ زاۋىتىن قايتا جاڭارتۋعا جوبالىق- سمەتالىق قۇجاتتاما ازىرلەۋ ءۇشىن قاراجات ءبولۋ تۋرالى ماسەلەنى شەشۋگە ۇلتتىق ەكونوميكا مينيسترلىگىنە ەنگىزىلەتىن بولادى»، - دەدى ول.
ۆيتسە- ءمينيستردىڭ سوزىنە قاراعاندا، قازىرگى كەزدە اتىراۋ وبلىسىنىڭ اكىمدىگى يايتسكي مەن گانيۋشكينو بالىق ءوتۋ ارنالارىنىڭ سۋ ءتۇبىن تەرەڭدەتۋگە جوبالىق- سمەتالىق قۇجاتتاما ازىرلەۋ بويىنشا قىزمەتتەردى مەملەكەتتىك ساتىپ الۋ ءراسىمىن اياقتادى. ءوز كەزەگىندە اۋىل شارۋاشىلىعى ءمينيسترى رەسپۋبليكلىق بيۋدجەتتىڭ قاراجاتى ەسەبىنەن جايىق- كاسپيي باسسەينىندە بالىق شارۋاشىلىعى مەليوراتسياسى بويىنشا ينۆەستيتسيالىق ۇسىنىس ازىرلەمەك.
ايتا كەتەيىك، ءماجىلىستىڭ اگرارلىق ماسەلەلەر كوميتەتىندە ەلىمىزدەگى بالىق شارۋاشىلىعىنىڭ جاعدايى جانە دامۋ ماسەلەلەرى تالقىلانۋدا.
اۆتور: مارلان جيەمباي
