اعايىندى كليچكولار تۋرنيرىندە قازاقستان بوكسشىلارى 2 «التىن» ەنشىلەدى

استانا. قازاقپارات - ۋكراينانىڭ بەرديچيەۆ قالاسىندا اعايىندى كليچكولاردىڭ جۇلدەسى ءۇشىن جاسوسپىرىمدەر اراسىندا «ا» ساناتىنداعى بوكستان 18- تۋرنير اياقتالدى.

وسى بايراقتى باسەكەدە قازاقستان بوكسشىلارى 2 التىن، 4 قولا مەدال جەڭىپ الدى، دەپ حابارلادى ق ر بوكس فەدەراتسياسىنىڭ باسپا ءسوز قىزمەتىنەن.

تۋرنيرگە 14 ەلدىڭ 18-19 جاستاعى 127 بىلعارى قولعاپ شەبەرى قاتىستى. ۋكرايناداعى جارىسقا ەلىمىزدىڭ اتىنان 10 سالماق ساناتىندا 11 بوكسشى قاتىستى. ناتيجەسىندە 52 كەلى سالماق ساناتىندا ورازبەك اسىلقۇلوۆ پەن 69 كەلى سالماق ساناتىندا سادريددين احمەتوۆ التىن مەدال يەلەندى. مۇنان بولەك، ەلىمىزدىڭ تاعى 4 بىلعارى قولعاپ شەبەرى «قولاعا» قول جەتكىزدى.

«بالالار جاقسى جۇدىرىقتاستى. ولاردىڭ وزدەرى دە جاتتىقتىرۋشىلارى دا ريزا. تۋرنيردى ۆيتالي كليچكو ونلاين تاماشالاپ، قازاقستان كومانداسىنا ارنايى سالەم جولدادى. ول ءار ۋاقىتتا قازاقستاندىق بوكسشىلارعا قۇرمەتپەن قارايدى. تۋرنير جوعارى دەڭگەيدە ءوتتى، ەۋروپانىڭ، الەم چەمپيوندارى بولدى. بارلىعى دا ءبىرىنشى قۇرامىن اكەلدى. ويتكەنى، كليچكولار تۋرنيرى الەم چەمپيوناتى الدىنداعى سوڭعى سىناق رەتىندە قاراستىرىلادى. ءبىز دە ءوز بوكسشىلارىمىزدى باقىلادىق، مۇمكىنشىلىكتەرىن ەكشەدىك. ەندى كوماندا دايىندىقتىڭ سوڭعى كەزەڭىن وتكىزەدى. ودان كەيىن 14- قاراشادا باستالاتىن الەم چەمپيوناتىنا قاتىسۋ ءۇشىن سانكت-پەتەربورعا اتتانامىز»، - دەدى قازاقستان جاستار قۇراماسىنىڭ باس باپكەرى عالىمبەك كەنجەبايەۆ.