گولوۆكين ۋەيدتى 2- راۋندتا سۇلاتىپ سالدى

استانا. قازاقپارات - لوس- اندجەلەستە ورتا سالماقتاعى WBA (Super) ، IBO، WBC (Interim) جانە IBF نۇسقالارى بويىنشا الەم چەمپيونى گەننادي گولوۆكين (35-0, 32 ك و) مەن امەريكالىق دومينيك ۋەيد اراسىنداعى جەكپە- جەك اياقتالدى.

بۇل جەكپە-جەككە گەنناديي گولوۆكين بارلىق بەلبەۋلەرىن - WBC (Interim) ، WBA، IBF، IBO تىككەن بولاتىن.

دومينيك ۋەيد كەزدەسۋدىڭ ءبىرىنشى راۋندىندا- اق نوكداۋنعا تۇسكەن بولاتىن. ەكىنشى تايمدا گولوۆكين امەريكالىق بوكشسىعا ەشبىر مۇمكىندىك قالدىرمادى. تايم باسىندا تاعى نوكداۋن العان ۋەيد كەزدەسۋدى جالعاستىرا الدى، الايدا كوپ ۇزاماي گولوۆكين ءوز قارسىلاسىن تاعى ءبىر مارتە جەرگە قۇلاتتى.

وسىلايشا، جەرلەسىمىز كاسىپقوي بوكستا وتكىزگەن 35 جەكپە- جەكتىڭ بارلىعىن جەڭىسپەن اياقتاپ وتىر، ونىڭ 32 سى - نوكاۋت.

دومينيك ۋەيدپەن جەكپە- جەك GGG ءۇشىن قاتارىنان 16- رەت چەمپيوندىق بەلدىكتى قورعاۋ بولدى.

بۇنىڭ الدىندا حابارلاعانىمىزداي، قازاقستاندىق بوكسشى گەنناديي گولوۆكين امەريكاندىق دومينيك ۋەيدپەن بولعان ايقاسى ءۇشىن 2 ميلليون دوللار الادى. گولوۆكين داۆيد لەمەمەن جۇدىرىقتاسقاندا تاپ وسىنداي مولشەردە گونورار تاپقان ەدى. ال دومينيك ۋەيدكە 500 مىڭ دوللار تولەنبەك.

قازاقستاندىق بوكسشىنىڭ جەكپە-جەگىن كورۋگە كەلگەن حالىقتىڭ سانىندا شەك بولمادى. 17 مىڭ ورىندىق «فورۋم» ارەناسىندا بيلەتتەردىڭ بارلىعى دەرلىك ساتىلىپ كەتكەن. جانكۇيەرلەردىڭ سۇراۋى بويىنشا ۇيىمداستىرۋشىلار قوسىمشا بيلەتتەر شىعارۋعا ءماجبۇر بولدى.

قازاقستاندىق بوكسشى كەلەسى كەزدەسۋىندە 7 -مامىردا وتەتىن ساۋل الۆارەس- امير حان جەكپە- جەگىنىڭ جەڭىمپازىمەن جۇدىرىقتاسۋى ءتيىس. سەبەبى گولوۆكين IBF/IBO/WBA تۇجىرىمدارى بويىنشا الەم چەمپيونى ءارى WBC نۇسقاسى بويىنشا الەمنىڭ ۋاقىتشا چەمپيونى، سوندىقتان ول الۆارەستىڭ WBC چەمپيوندىق تيتۋلىنا مىندەتتى ۇمىتكەر سانالادى. الايدا ساۋل الۆارەس كومانداسى ورتا سالماق اياسىندا (160 فۋنت) قازاقستاندىق بوكسشىمەن ايقاس وتكىزۋگە نيەتتەرى جوق ەكەندىكتەرىن بايقاتتى.