الماتى مارافونىنا تىركەۋ اياقتالۋىنا 2 تاۋلىك قالدى

الماتى. قازاقپارات - الماتى مارافونىنا تىركەۋ اياقتالۋىنا 2 تاۋلىك قالدى. بىلتىر 17- تامىزدا اشىلعان ونلاين-تىركەۋ 17- ساۋىردە رەسمي تۇردە جابىلادى.

بۇل تۋرالى جارىستىڭ ۇيىمداستىرۋ كوميتەتىنىڭ وكىلدەرى ايتتى.

«V الماتى مارافونىنا قاتىسۋعا ارنالعان ونلاين-تىركەلۋ تۋرا جارتى جىل بۇرىن اشىلعان. وسى ۋاقىت ىشىندە بارلىق ادامداردا ءار ءتۇرلى قاشىقتىقتاردا اتاۋلى ءنومىر الۋ، جاڭا قاشىقتىق «سكانديناۆيا جۇرىسىنە» تىركەلۋ، الماتى مارافونىنىڭ فيرمالىق فۋتبولكاسىن الىپ، ونىمەن مارافون سورەسىنە شىعۋ مۇمكىندىكتەرى بولدى.

جارىس الماتى قالاسى اكىمدىگىنىڭ قولداۋىمەن «سپورتتىق الماتى» باعدارلاماسى اياسىندا وتەدى. ەكى كۇننەن كەيىن ونلاين تىركەلۋ توقتايدى، سوندىقتان بەلگىلى ءبىر سەبەپتەرمەن الماتى مارافونىنا تىركەلمەگەندەردى www.almaty-marathon.kz سايتىمىزعا كىرىپ، تىركەلۋدەن تەزدەتىپ وتۋگە شاقىرامىز»، - دەدى ۇيىمداستىرۋ كوميتەتىنىڭ ديرەكتورى سالتانات قازىبايەۆا.

ايتا كەتۋ كەرەك، بيىلعى جارىستان تۇسكەن قارجى «اردي» مۇگەدەك بالالاردىڭ اتا-انالارى قاۋىمداستىعىنا تىرەك-قيمىل جۇيەسىن وڭالتاتىن 4 اپپارات الۋعا جۇمسالادى.

ديرەكتوردىڭ ايتۋىنشا، بيىلعى بايقاۋدا بۇرىن جىبەرىلگەن قاتەلىكتەردىڭ بارلىعى ەسكەرىلمەك. ماسەلەن قاتىسۋشىلارعا بيىل سورە نومىرلەرى اتاۋلى تۇردە بەرىلەدى. سونداي-اق، جۇگىرۋشىلەرگە ارناپ جاڭا ديستسيپلينا اشىلدى.

«كوپتەگەن مارافوندا كورگەندەرىڭىزدەي، ورتاسىندا قارقىندى ازايتىپ، اياڭعا تۇسەتىن ادامدار بولادى. ولار جۇيرىكتەردىڭ جولىن بوگەيدى. سوندىقتان، ولارعا ارنالىپ، «سكانديناۆ ءجۇرىسى» ديستسيپليناسى ەنگىزىلدى. ەندى ولار ارتتاعىلارعا بوگەت بولماي، ەڭ سوڭعى 10 شاقىرىمدىق قاشىقتىققا شىعاتىن بولادى»، - دەدى س. قازىبايەۆا.

سونىمەن قاتار، ءار قاشىقتىقتىڭ ءوز مەدالى بولادى.

بيىلعى مەرەيتويلىق مارافوندا 42 شاقىرىم قاشىقتىققا 8 پەيسمەيكەر شىعاتىن بولادى. بۇل سپورتشىلار جۇگىرۋ قارقىنىن باسەڭدەتپەۋگە، قاتىسۋشىلاردى ىنتالاندىرۋعا جۇمىس ىستەيتىن بولادى.

ۇيىمداستىرۋ كوميتەتى بيىلعى بايقاۋعا 15 مىڭ ادام قاتىساتىنىنا ۇمىتتەنىپ وتىر.

ايتا كەتۋ كەرەك، ماڭىزى سپورتتىق شارا 24- ساۋىردە وتەدى.

اۆتور: گۇلميرا عوسمانالي