الماتى دارىگەرلەرى 2 بالانىڭ باۋىرىن اۋىستىردى
وتاعا اپوللو (نيۋ- دەلي) اۋرۋحاناسىنىڭ پروفەسسورى سۋباش گۋپتا قاتىستى.
ءوت جولدارى ارترەزياسىنا شالدىققان 5 ايلىق مۇراتبەكوۆا اسىلايعا دونور بولۋعا 33 جاستاعى تاتەسى كەلىسكەن. وتا 8 ساعاتقا سوزىلعان. وپەراتسياعا ەكى كوماندا قاتىسقان. ءبىرى دونوردىڭ مۇشەسىن الۋمەن اينالىسسا، ەكىنشىسى رەتسەپيەنتتىڭ باسى قاسىندا بولعان.
دارىگەردىڭ ايتۋىنشا، قازاقستاندا تۋىلعان 350 مىڭنان اسا بالانىڭ 15-20-سى وسىنداي اقاۋمەن دۇنيەگە كەلەدى. ادەتتە ولار 8-10-ايدان ارتىق ءومىر سۇرمەيدى.
«بالانىڭ قىلداي تامىرلارى 15 جەردەن تىگىلدى. ونى قۇتقارماعان جاعدايدا 1 اپتا عانا ءومىرى قالعان ەدى. بالا تۋىلعاندا ءوت جۇرەتىن جولدارى بىتىك بولادى. وپەراتسيادان باسقا شىعار جول جوق»، - دەدى ب. بايماحانوۆ.
قازىر بالانىڭ دەنساۋلىعى جاقسى. جانساقتاۋ بولىمىنەن شىعارىلدى.
كريپتوگەندى سيرروزعا شالدىققان 7 جاستاعى بوستاندىق يسمايلعا دا نەمەرە اپكەسى ايدا دونور بولۋعا كەلىسكەن.
وتادان كەيىنگى 12 كۇن ىشىندە بالانىڭ دەنساۋلىعى قالىپتى. ەشقانداي اسقىنۋ جوق. ال دونورلاردىڭ دەنساۋلىعى وتە جاقسى. ولار اۋرۋحانادان شىعىپ كەتتى.
«2016 - جىلى ۇلتتىق ورتالىق قىزمەتكەرلەرى الدىنا «دەنساۋلىق» مەملەكەتتىك باعدارلاماسىن جۇزەگە اسىرۋ بارىسىندا بالالارعا باۋىر ترانسپلانتاتسياسىن جاساۋدى جولعا قويۋ مىندەت ەتىلدى. بۇل وتالار قازاقستان مەديتسيناسىنىڭ دامۋى جوعارى ەكەندىگىن كورسەتەدى. قازىر ت م د ەلدەرىنىڭ ىشىندە تەك ۋكراينا، بەلارۋس، رەسەيدە جاسالادى. بىزگە قىرعىزستان مەن وزبەكستان ەلدەرىنەن ترانسپلانتاتسياعا مۇقتاج ادامدار كەلەدى. سوڭعى كەزدە ولاردىڭ سانى كۇرت ءوستى. ويتكەنى، بىزدە وتا قۇنى وتە ارزان. 10 مىڭ ا ق ش دوللارى كولەمىندە. ال ەۋروپادا 100 مىڭ ەۋرو تۇرادى»، - دەدى ۇلتتىق ورتالىقتىڭ باس ديرەكتورى ب. بايماحانوۆ.
ايتا كەتۋ ەرەك، بۇعان دەيىن قازاقستاندا 8 بالانىڭ باۋىرى اۋىستىرىلعان.
العاشقى رەت 6 جاستاعى ناۋقاس بالانىڭ باۋىرى جەدەل مەديتسينالىق كومەك كورسەتۋ ورتالىعىندا حيرۋرگ و. رۋممونىڭ جەتەكشىلىگىمەن اۋىستىرىلدى. 2014-2015 - جىلدارى ۇلتتىق انا مەن بالا عىلىمي ورتالىعىندا 5 بالانىڭ باۋىرى اۋىستىرىلدى.
4 جىل ىشىندە قازاقستاندا بارلىعى 800 دەن اسا ترانسپلانتاتسيالىق وتا جاسالدى. ونىڭ باسىم كوپشىلىگى بۇيرەك، ودان كەيىنگى كەزەكتە باۋىر، سوسىن جۇرەك اۋىستىرۋ جۇزەگە استى. بولاشاقتا ۇيقى بەزىن اۋىستىرۋ جوسپارلانىپ وتىر.
ماماننىڭ ايتۋىنشا، قازىر كەزەكتە الماتىدا وتاعا مۇقتاج ەكى بالا تۇر. ولاردىڭ بىرىنە اكەسى ءوز باۋىرىنىڭ جارتىسىن بەرمەك. وتا كەلەسى اپتاعا جوسپارلانىپ جاتىر.
اۆتور: گۇلميرا عوسمانالي
