07:36, 22 - قازان 2015 | GMT +5
جاس جىگىت «ۆكونتاكتە» الەۋمەتتىك جەلىسىنە بەينەروليك جاريالاعانى ءۇشىن 2 جىلعا سوتتالۋى مۇمكىن
استانا. قازاقپارات - رەسەي فەدەراتسياسى سۋرگۋت قالاسىنىڭ 19 جاستاعى تۇرعىنى «ۆكونتاكتە» الەۋمەتتىك جەلىسىندەگى جەكە پاراقشاسىنا ەكسترەميستىك پيعىلداعى بەينەروليك جاريالاعانى ءۇشىن 2 جىل باس بوستاندىعىنان ايرىلۋى مۇمكىن، دەپ جازادى «مۋكسۋن» راديوسى.
تەرگەۋشىلەردىڭ اقپاراتىنا سۇيەنسەك، ول 2014 -جىلدىڭ جەلتوقسانىنان باستاپ، 2015 -جىلدىڭ اقپان ايىنا دەيىن ءوزىنىڭ جەكە كومپيۋتەرىنەن «ۆكونتاكتە» الەۋمەتتىك جەلىسىندەگى جەكە پاراقشاسىنا اۋديوفايل، بەينەروليكتەر جاريالاپ كەلگەن. ساراپتاما قورىتىندىسى بويىنشا، ول جاريالاعان ماتەريالدار ۇلتارالىق ارازدىقتى قوزدىرۋ سيپاتىندا، وزگە ادامداردىڭ ار-نامىسىن قورلايتىن، ەكسترەميستىك پيعىلدا بولعان.
وسىعان قاتىستى قوزعالعان قىلمىستىق ءىس سوتقا جولداندى. ەندى كۇدىكتى 300 مىڭ رۋبلگە دەيىن ايىپ تولەۋى نەمەسە 2 جىل تۇرمەگە وتىرۋى مۇمكىن.
