سەرىك احمەتوۆتىڭ تۋىستارى مەملەكەتتىڭ 2 ميلليون دوللارعا جۋىق شىعىنىن وتەدى
«احمەتوۆتىڭ ءوزى دە، ءىس بويىنشا كۋاگەر بولعان اعاسى دا مەملەكەتكە شىعىن كەلگەنىن مويىندامادى. الايدا ونىڭ اعاسى احمەتوۆكە ارتىلعان شىعىن سوماسىنىڭ جارتىسىن تولەۋگە شەشىم قابىلدادى. ول سومانىڭ جارتىسىنا جۋىقتايدى»، - دەيدى تەرگەۋ توبىنداعىلار.
احمەتوۆتىڭ مەملەكەتكە كەلتىرگەن شىعىنىنىڭ جالپى سوماسى، تەرگەۋ تۇجىرىمى بويىنشا، 1,2 ميلليارد تەڭگەگە (6,4 ميلليون دوللار) تەڭ.
اگەنتتىككە مالىمەت بەرۋشى ادامنىڭ سوزىنە قاراعاندا، احمەتوۆتىڭ اعاسى "ستال سينك" ج ش س- نىڭ ديرەكتورى، ول كاسىپورىن قىلمىستىق ءىستىڭ ماتەريالدارىندا كوشەنى جارىقتاندىرۋعا ارنالعان تىرەكتەردى ورناتۋ بويىنشا مەملەكەتتىك تاپسىرىستىڭ باسىم بولىگىن الۋشى رەتىندە ايتىلعان.
دۇيسەنبى كۇنى قازاقستاننىڭ بۇرىنعى پرەمەر- ءمينيسترى سەرىك احمەتوۆكە، سونىمەن قاتار، قاراعاندى وبلىستىق اكىمدىگىنىڭ ءبىرقاتار لاۋازىمدى تۇلعاسىنا قاتىستى ءىستىڭ الدىن الا تىڭداۋى قاراعاندىنىڭ قىلمىستىق ىستەر بويىنشا مامانداندىرىلعان اۋدانارالىق سوتىندا ءوتتى.
ولاردىڭ بارلىعى قىزمەتىن اسىرا پايدالاندى، بيۋدجەت قارجىسىن جىمقىردى جانە كاسىپكەرلىك قىزمەتىنە زاڭسىز ارالاستى دەپ ايىپتالىپ وتىر. سونىمەن بىرگە، احمەتوۆ ءىرى كولەمدە پارا الدى دەپ ايىپتالدى. قىلمىستىق ءىستىڭ كولەمى 338 تومعا جەتتى.
سەرىك احمەتوۆ - قازاقستاننىڭ بۇرىنعى قورعانىس ءمينيسترى، ول پرەمەر- مينيستر، ءبىرىنشى ۆيتسە- پرەمەر، وعان دەيىن قاراعاندى وبلىسىنىڭ اكىمى بولدى. 2014 -جىلى 18 -قاراشادا ءىرى كولەمدە اقشا جىمقىردى دەگەن كۇدىكپەن ءۇي قاماۋىنا الىندى. ءۇي قاماۋىنىڭ مەرزىمى بىرنەشە رەت ۇزارتىلدى.
كەيىن قازاقستاننىڭ بۇرىنعى ءمينيسترى سەرىك احمەتوۆكە جەمقورلىق ماندەگى التى قىلمىس بويىنشا رەسمي تۇردە ايىپ تاعىلعان بولاتىن، ولاردىڭ قاتارىندا اسا ءىرى كولەمدە پارا الدى (تەرگەۋدىڭ تۇجىرىمىنشا، 2 ميلليون 400 مىڭ دوللار - اۆت. )، اسا ءىرى كولەمدە بيۋدجەت قارجىسىن جىمقىردى، لاۋازىمىن اسىرا پايدالاندى جانە كاسىپكەرلىك قىزمەتكە زاڭسىز ارالاستى دەگەن ايىپتار بار.
