ۋنيۆەرسيادادان كەيىن اتلەتيكالىق اۋىلدىڭ 2 مىڭعا جۋىق پاتەرى تۇرعىندارعا تاراتىلادى - ق. ورازبەكوۆ
بۇل تۋرالى بۇگىن الماتىدا ۋنيۆەرسيادا نىساندارىنا جاسالعان باسپا ءسوز- تۋرى بارىسىندا «ەليتستروي» قۇرىلىس كومپانياسىنىڭ پرەزيدەنتى قايرات ورازبەكوۆ مالىمدەدى.
ونىڭ ايتۋىنشا اتلەتيكالىق اۋىلدىڭ تۇرعىن ۇيلىك عيماراتتارى «قازاقستان يپوتەكالىق كومپانياسى» ا ق وڭىرلەردى دامىتۋدىڭ 2020 - جىلعا دەيىنگى باعدارلاماسى جانە «قول جەتىمدى باسپانا-2020» مەملەكەتتىك باعدارلاماسىنىڭ تالاپتارىنا سايكەستەندىرىلىپ سالىنىپ جاتىر.
«جوبا بويىنشا 36 شارشى مەتردەن 45 شارشى مەترگە دەيىنگى، 48 دەن 56 عا جانە 64 تەن 89 شارشى مەترگە دەيىنگى پاتەرلەر ۋنيۆەرسيادا ويىندارى اياقتالعان سوڭ، ارنايى باعدارلامالار بويىنشا كەزەكتە تۇرعان تۇرعىندارعا تاراتىلىپ بەرىلەدى. قازىر، ارينە، مۇندا بولمەلەر سپورتشىلار ءۇشىن ترانسفورمەرلەر تۇرىندە سالىنىپ جاتىر. ال ويىندار اياقتالىپ، سپورتشىلار ەلدەرىنە قايتقان سوڭ، 2-3 اي كولەمىندە بولمەلەر قايتا جاساقتالادى. ياعني سىزىلعان، كەرتىلگەن جەرلەرى جوندەلەدى، جاڭادان ەسىكتەر سالىنادى، ءسويتىپ 1-2-3 بولمەلى پاتەرلەرگە اينالدىرىلىپ تۇرعىندارعا تاراتىلادى. جالپى 1780 پاتەردى تۇرعىندارعا بەرۋ جوسپارلانىپ وتىر»، - دەدى ءوز سوزىندە ق. ورازبەكوۆ.
ول سونىمەن قاتار، «ەليت ستروي» قۇرىلىس كومپانياسى سالىپ جاتقان اتلەتيكالىق اۋىلدىڭ قۇرىلىسى قارقىندى ءجۇرىپ جاتقاندىعىن جەتكىزدى.
«ءبىز سالىنۋ كەستەسىنىڭ ۋاقىتىنان 30-40 كۇن الدا كەلەمىز. قۇداي قالاسا، 2016 - جىلدىڭ تامىز ايىنىڭ اياعى مەن قىركۇيەك ايىنىڭ باسىندا اۋىل قولدانىسقا بەرىلەدى. قازىر جالپى قۇرىلىستىڭ 25 پايىزى يگەرىلدى. ۋنيۆەرسيادانىڭ وتكىزۋ تۇجىرىمداماسى بويىنشا اتلەتيكالىق اۋىل - 10 بلوكتان تۇراتىن قالاشىق. ءبىر بلوكتىڭ اۋدانى 7 مىڭ شارشى مەتردى قۇرايدى. جوعارىدان قاراعاندا قالاشىق «U» ءارىپىن كوزگە ەلەستەتەدى. اتلەتيكالىق اۋىل 5000 عا جۋىق سپورتشىنى قابىلداۋعا شاقتالعان. جالپى اۋدانى 20 گەكتاردان استام جەردى الىپ جاتىر. تۇرعىن ۇيلىك عيماراتتاردىڭ جالپى كولەمى 124901 شارشى مەتردى قۇرايدى. سونىمەن قاتار، مۇندا تۇرعىن ۇيلەرمەن قوسا سپورت كەشەنى، سۋپەرماركەت، مەديتسينالىق ورتالىق، كينوتەاتر، باسسەين، ستاديون جانە باسقا دا ينفراقۇرىلىمدار بوي كوتەرەدى. اۋىلدىڭ بارلىق اۋماعىندا Wi-Fi قولجەتىمدى بولادى»، - دەدى ق. ورازبەكوۆ.
ايتا كەتەلىك، اتلەتيكالىق اۋىل مومىش ۇلى كوشەسى مەن رىسقۇلوۆ داڭعىلىنا جاقىن جەردە جانە 12000 ورىندىق مۇز ايدىنىنىڭ ىرگەسىندە ورنالاسقان.
اۆتور: جاپپاربەرگەن ايبوتا
