جۇرگىزۋشىدەن اقشا بوپسالاعان 2 پوليتسەيدىڭ ۇستىنەن قىلمىستىق ءىس قوزعالدى
ولاردىڭ بەينەكامەراعا ءتۇسىرىلىپ قالعان ءجونسىز ارەكەتى الەۋمەتتىك جەلى ارقىلى كوپشىلىككە بەلگىلى بولدى. قوعامدى دۇرلىكتىرگەن بۇل جايتقا قاتىستى قازىر رەسمي تۇردە تەرگەۋ باستالدى.
بۇل اتىشۋلى بەينەتۇسىرىلىمگە وڭاي ولجاعا كەنەلمەك بولعان پوليتسەيلەر ءتۇسىپ قالعان. جول ساقشىلارى ساعات 03:00 دە بىشكەك كوشەلەرىنىڭ بىرىندە كولىك جۇرگىزۋشىسىن توقتاتادى. تەكسەرىس كەزىندە ازاماتتىڭ تەمىر تۇلپاردى جۇرگىزۋگە قۇجاتى بولماي شىققان.
مۇنى پايدالانعان ينسپەكتورلاردىڭ ءبىرى 5 مىڭ سوم، ياعني شامامەن 15 مىڭ تەڭگە كولەمىندە اقشا تالاپ ەتەدى.
قاشقار جۇنىشاليەۆ، بىشكەك قالاسى ىشكى ىستەر باس باسقارماسىنىڭ باسشىسى:
- بىشكەك ىشكى ىستەر باسقارماسىنىڭ جول-پاترۋلدىك پوليتسياسى قىزمەتكەرلەرى ءمينيستردىڭ تاپسىرماسى بويىنشا جۇمىستان شەتتەتىلدى. ال مەنىڭ بۇيرىعىم بويىنشا تەرگەۋ شارالارى اياقتالعانشا ۋاقىتشا قىزمەتىنەن بوساتىلدى.
قازىر وسى وقيعاعا قاتىسى بارلاردىڭ ۇستىنەن قىلمىستىق ءىس قوزعالدى. سوراقىسى، جول ساقشىلارىنىڭ بىلىعى اشكەرەلەنگەن بۇل العاشقى جاعداي ەمەس. بيىلدىڭ وزىندە قارۋىن وڭدى- سولدى جۇمساعان پوليتسەيلەرگە قاتىستى 2 رەت شۋ شىقتى. ونىڭ بىرىندە كولىك جۇرگىزۋشىسى كوز جۇمدى.
رىسقۇل جاپارقۇلوۆ، قىرعىزستان ىشكى ىستەر ءمينيسترىنىڭ ورىنباسارى:
- ارينە، مۇنداي كەلەڭسىز جايتتار بولىپ جاتىر. ءبىزدىڭ ىشكى ىستەر مينيسترلىگى باسقا دا بولىمشەلەرمەن بىرىگىپ، اقپارات قۇرالدارىندا جاريالانعان دەرەكتەرگە قاتىستى تەكسەرىس جۇمىستارىن جۇرگىزۋدە.
بيىل العاشقى جارتىجىلدىقتا 262 جول-پاترۋلدىك پوليتسيا قىزمەتكەرى اكىمشىلىك جانە تارتىپتىك جاۋاپكەرشىلىككە تارتىلدى.
ىشكى ىستەر مينيسترلىگىنىڭ مالىمەتى وسىنداي. ءبىراق جازا قاتاڭ بولعانىمەن، جۇگەنسىز ساقشىلارعا بۇل توسقاۋىل بولماي تۇر. ال تويىمسىز ءتارتىپ ساقشىلاردىڭ ءجونسىز تۇرتپەگىنەن شارشاعان كولىك جۇرگىزۋشىلەرى بەينەكامەرالارىن ەندى تاستاماي جۇرۋگە ءماجبۇر.
www.24.kz
