شۇعىل: استانا اۆتوبەكەتىنەن بومبا ىزدەۋ بارىسىندا 2 مىڭ ادام قاۋىپسىز جەرگە كوشىرىلدى
30- شىلدە كۇنى ساعات 13:31 دە بەلگىسىز ايەل بەكەتكە بومبا قويىلعاندىعىن ايتىپ، تەلەفون شالعان.
«جارىلىس» تۋرالى حابار كەلىپ تۇسكەننەن كەيىن اۆتوبەكەتتىڭ جۇمىسى توقتاتىلدى. عيماراتتان ەكى مىڭنان استام ادام قاۋىپسىز جەرگە كوشىرىلدى، ال وعان جاپسارلاس ايماقتان قالاارالىق قاتىناسقا شىعاتىن 13 اۆتوبۋس پەن 12 جەڭىل كولىك شىعارىلدى. «ارلان» ارنايى بولىمشەسىنىڭ قىزمەتكەرلەرى مەن كينولوگيالىق ورتالىقتىڭ قىزمەتتىك يتتەرىنىڭ كومەگىمەن عيمارات جانە وعان جاپسارلاس ايماق ءجىتى تەكسەرىلدى. جارىلعىش زات تابىلعان جوق»، - دەلىنگەن تاراتىلعان اقپاراتتا.
قالالىق ءى ءى د مالىمەتتەرىنە قاراعاندا، لاڭكەستىك جايىندا جالعان اقپارات بەرگەن اقمولا وبلىسىنىڭ 25 جاستاعى تۇرعىنى ۇستالىپ، ول ءوز كىناسىن مويىنداپ وتىر. «ۇستالعان ازاماتشانىڭ ايتۋىنشا، ول اۆتوبەكەت عيماراتىندا ءجۇرىپ، لاڭكەستىككە قارسى قورعانىس بۋكلەتىندەگى كورسەتىلگەن تەلەفون نومىرىنە قوڭىراۋ شالعان. وسى ارەكەتى ارقىلى شۇعىل قىزمەتتەردىڭ لاڭكەستىك جايىنداعى اقپاراتقا قالاي جەدەل ارەكەت ەتەتىندىگىن تەكسەرىپ كورمەك بولعان»، - دەدى ۆەدومستۆودان.
اتالعان فاكتى بويىنشا ق ر ق ك 242- بابى بويىنشا قىلمىستىق ءىس قوزعالدى. تەرگەۋ امالدارى جۇرگىزىلۋدە. ۇستالعان ازاماتشا استانا قالالىق ءى ءى د-ءنىڭ ۋاقىتشا وقشاۋلاۋ اباقتىسىنا قامالدى. وعان كەلتىرىلگەن ماتەريالدىق شىعىندى قالپىنا كەلتىرۋ تۋرالى دا تالاپ ارىز بەرىلەتىن بولادى. ايتا كەتەرلىگى، مۇنداي قۇقىق بۇزۋشىلىعى ءۇشىن ول 6 جىلعا دەيىن باس بوستاندىعىنان ايىرىلۋى مۇمكىن.
اۆتور: مارلان جيەمباي
