رەسپۋبليكالىق وليمپيادادا جەڭىسكە جەتكەن 29 وقۋشىعا ءبىلىم گرانتى تابىستالدى

استانا. قازاقپارات - جاراتىلىس تانۋ - ماتەماتيكالىق باعىتتاعى پاندەر بويىنشا رەسپۋبليكالىق وليمپيادانىڭ قورىتىندىسى بويىنشا 422 وقۋشى جۇلدەلى ورىندارعا يە بولدى. ونىڭ 86 سى التىن، 127 ءسى كۇمىس، 209 ءى قولا مەدال، دەپ حابارلايدى قر وقۋ-اعارتۋ مينيسترلىگىنىڭ باسپا ءسوز قىزمەتى.

«ۇزدىك وليمپيادالىق كوماندا» نوميناتسياسىنىڭ باس جۇلدەسىنە ن ز م وقۋشىلارى يە بولدى. ءبىرىنشى ورىندى الماتى قالاسىنىڭ ءبىرقاتار مەكتەپتەرى مەن رەسپۋبليكالىق فيزيكا-ماتەماتيكا مەكتەپ كومانداسى يەلەندى. استانا قالاسى، ماڭعىستاۋ جانە شىعىس قازاقستان وبلىستارىنىڭ كوماندالارى ەكىنشى ورىندى جەڭىپ السا، اتىراۋ، اقتوبە، قىزىلوردا جانە قاراعاندى وبلىستارىنىڭ وقۋشىلارى ءۇشىنشى ورىنعا يە بولدى.

سونىمەن قاتار اباي وبلىسىنىڭ 10- سىنىپ وقۋشىسى ءامىر شاۋكەنوۆ «اۋىلدىق جەردىڭ ۇزدىك وقۋشىسى» نوميناتسياسىمەن ماراپاتتالدى.

بۇل وليمپيادانىڭ ەرەكشەلىگى بيىلعى جەڭىمپاز تۇلەكتەرگە ءبىلىم گرانتى تابىستالدى. ەلىمىزدىڭ جەتەكشى جوعارى وقۋ ورىندارىنا 29 گرانت بەرىلدى. ول ى. التىنسارين اتىنداعى ارقالىق پەداگوگيكالىق ينستيتۋتى، وڭتۇستىك قازاقستان مەملەكەتتىك پەداگوگيكالىق ۋنيۆەرسيتەتى، Toraighyrov University ،Satbayev University ،IT حالىقارالىق ۋنيۆەرسيتەتى، د. سەرىكبايەۆ اتىنداعى شقتۋ، Auezov University ،Shakarim University ،KBTU.