ورىنبوردا ىشىمدىككە ۋلانىپ كوز جۇمعاندار سانى 29 بولدى
«رەسەي تەرگەۋ ورگاندارى ورىنبور وبلىسىنداعى ىشىمدىكتەن ۋلانۋ وقيعاسى بويىنشا قىلمىستىق ءىستى جان- جاقتى تەرگەپ جاتىر. وسى ۋاقىتقا دەيىن تەرگەۋ بارىسىندا ورىنبور وبلىسىنىڭ ءتورت اۋماقتىق بولىنىسىندە تۇراتىن 29 ادامنىڭ قازاسىنىڭ ەگجەي- تەگجەيى زەردەلەنىپ جاتىر. زارداپ شەككەن باسقا دا ادامدارعا ءتيىستى كومەك كورسەتىلۋدە» دەلىنگەن رەسەي تەرگەۋ كوميتەتىنىڭ سايتىندا جاريالانعان مالىمەتتە.
ەسكە سالا كەتەيىك، رەسەيدىڭ ورىنبور وبلىسىندا ەلۋدەن استام ادام الكوگولدى ىشىمدىككە ۋلانىپ، اۋرۋحاناعا تۇسكەن. ونىڭ 29-ى كوز جۇمدى. كونترافاكت ىشىمدىكتەن ۋلانۋ تۋرالى حابار 7 - قازان كۇنى تۇندە تۇسكەن. تەرگەۋشىلەر مەن پوليتسەيلەر قويما مەن ءوندىرىس بەكەتىن تاۋىپ، 600 ليتر سپيرتى بار سۇيىقتىقتى تاركىلەدى. التى قىلمىستىق ءىس قوزعالدى. الكوگول ونىمدەرىن زاڭسىز ءوندىرىپ، ساقتاعان جانە ساتقان 9 ادام ۇستالدى.
