پرەزيدەنت 29- تامىزدى جالپىۇلتتىق ازا تۇتۋ كۇنى دەپ جاريالادى
«جامبىل وبلىسى بايزاق اۋدانىنداعى ادام ولىمىنە اكەپ سوقتىرعان قايعىلى وقيعاعا بايلانىستى 29 - تامىزدى جالپىۇلتتىق ازا تۇتۋ كۇنى دەپ جاريالايمىن. قازا بولعان اسكەري قىزمەتشىلەر مەن قۇتقارۋشىلار ەرەن ەرلىك پەن ناعىز جانقيارلىق كورسەتتى. ەرلەرىمىزدىڭ ەسىمى ەل جادىندا ماڭگى ساقتالادى»، دەپ جازدى پرەزيدەنت Twitter - دەگى پاراقشاسىندا.
وق-دارىلەر قويماسىنداعى ءورت پەن جارىلىستاردىڭ سالدارىنان ادامداردىڭ قازاعا ۇشىراۋىنا بايلانىستى قازاقستان رەسپۋبليكاسىندا جالپىۇلتتىق ازا تۇتۋ جاريالاۋ تۋرالى پرەزيدەنت وكىمى شىقتى.
«جامبىل وبلىسىنىڭ بايزاق اۋدانىندا وق-دارىلەر قويماسىنداعى ءورت پەن جارىلىستاردىڭ سالدارىنان ادامداردىڭ قازاعا ۇشىراۋىنا بايلانىستى قازاقستان رەسپۋبليكاسىندا 2021-جىلعى 29 - تامىزدا جالپىۇلتتىق ازا تۇتۋ جاريالانسىن»، دەلىنگەن قۇجاتتا.
ەستەرىڭىزگە سالا كەتسەك، 26 - تامىزدا ساعات شامامەن 19:00 دە جامبىل وبلىسىنىڭ بايزاق اۋدانىندا ورنالاسقان اسكەري ءبولىم قويمالارىنىڭ بىرىنەن ءورت شىعىپ، جويقىن جارىلىس بولدى.
سوڭعى مالىمەت بويىنشا، جامبىل وبلىسىنداعى جارىلىستان 12 ادام قازا تاپقان. دەنساۋلىق ساقتاۋ مينيسترلىگىنىڭ مالىمەتىنە سايكەس، بارلىعى 98 ادام مەديتسينالىق كومەككە جۇگىنگەن. ولاردىڭ 37 ءسى اۋرۋحاناعا جاتقىزىلىپ، قالعاندارى جاراقات پۋنكتتەرىندە ءتيىستى كومەك الىپ، ۇيلەرىنە جىبەرىلگەن.
تاراز قالاسىنىڭ ستاتسيونارلارىندا ەم الىپ جاتقان زارداپ شەگۋشىنىڭ بەسەۋى رەانيماتسيادا، ەكەۋىنىڭ جاعدايى اۋىر. پرەزيدەنت قاسىم-جومارت توقايەۆ توتەنشە وقيعاعا بايلانىستى شۇعىل جينالىس وتكىزدى، ونىڭ قورىتىندىسى بويىنشا توتەنشە جاعدايدىڭ سالدارىن جويۋ ءۇشىن ۆەدومستۆوارالىق مەملەكەتتىك كوميسسيا قۇرىلدى، ونىڭ پرەمەر-ءمينيستردىڭ ورىنباسارى رومان سكليار باسقارادى.