قازاقپارات كۇنتىزبەسى: 29- جەلتوقسان

بيولوگيالىق ءارالۋاندىقتىڭ حالىقارالىق كۇنى

ب ۇ ۇ باس اسسامبلەياسى 49-سەسسياسىنىڭ (1995) شەشىمى بويىنشا بيولوگيالىق ءارالۋاندىق (جەردىڭ فلوراسى مەن فاۋناسى، 1993) تۋرالى حالىقارالىق كونۆەنتسيانىڭ كۇشىنە ەنگەن كۇنىنەن باستاپ تويلانادى.

ەستە قالار وقيعالار

1995-جىلى ق ر كونستيتۋتسيالىق كەڭەسى (ك ك) قۇرىلدى. ول - قازاقستانداعى كونستيتۋتسيالىق باقىلاۋدى جۇزەگە اسىراتىن ۇجىمدىق ورگان. قازاقستان كونستيتۋتسياسىنىڭ 72-بابىنا سايكەس، ك ك ق ر پرەزيدەنتى سايلاۋىنىڭ، پارلامەنت دەپۋتاتتارى سايلاۋنىڭ جانە رەسپۋبليكالىق رەفەرەندۋمنىڭ دۇرىس ءوتۋىن قاداعالايدى.

2004 -جىلى استانانىڭ سول جاعالاۋىنداعى قازاقستان رەسپۋبليكاسى پارلامەنتىنىڭ جاڭا عيماراتىندا ءماجىلىستىڭ ءبىرىنشى جالپى وتىرىسى ءوتتى.

2005 -جىلى سەمەيدە «شاكارىم» عىلىمي-پەداگوگيكالىق جۋرنالى جارىق كوردى. ول قازاق، ورىس جانە اعىلشىن تىلدەرىندە باسىلىپ شىعادى. باسىلىمنىڭ باستى ماقساتى - شاكارىم قۇدايبەردى ۇلىنىڭ شىعارماشىلىعى ارقىلى ۇلتتىق قۇندىلىقتارىمىزدى زەرتتەۋ مەن جاريالاۋ. باسىلىم 1 مىڭ دانا تارالىممەن جىلىنا 4 رەت شىعادى.

2012 -جىلى جامبىل وبلىسىنىڭ قورداي اۋدانىندا قازاقستاندا العاشقى ونەركاسىپتىك اۋقىمداعى كۇن ەلەكتر ستانساسى ىسكە قوسىلدى. جەكەمەنشىك ينۆەستيتسيالار ەسەبىنەن سالىنعان ستانسا جالپى ەلەكتر جەلىلەرىنە قوسىلعان ءارى وندىرگەن ەنەرگياسىن ەلىمىزدىڭ ءبىرىڭعاي ەنەرگەتيكا جۇيەسىنە بەرە الادى.

2016 -جىلى «جىل ادامى-2016» باستى سىيلىعىنىڭ «جىل ەرلىگى» نوميناتسياسىن 3 بالانى امان-ەسەن ورتتەن الىپ شىققان 8-سىنىپ وقۋشىسى عالىمجان كۇزەمبايەۆ الدى.

2016 -جىلى ماڭعىستاۋ وبلىسىنىڭ ماڭعىستاۋ اۋدانىندا «شولتوبە-ۇشتاعان-باسقۇدىق-جارما» گاز قۇبىرى ىسكە قوسىلىپ، ۇشتاعان، باسقۇدىق جانە جارما اۋىل تۇرعىندارىنىڭ ۇيىندە كوگىلدىر وتىن پايدا بولدى. گاز قۇبىرىنىڭ جالپى ۇزىندىعى - 92,67 شاقىرىم. ونىڭ قۇرىلىسىنا «سامۇرىق قازىنا» ۇلتتىق ءال-اۋقات قورىنان قاراجات ءبولىندى.

الەۋمەتتىك ماڭىزدى جوبانى ورىنداۋعا بيۋجەت قارجىسىنان 898 ميلليون 576 مىڭ تەڭگە جۇمسالدى.

2017 -جىلى بولگاريانىڭ حالىق جينالىسى ۆارنا قالاسىندا قازاقستاننىڭ جاڭا قۇرمەتتى كونسۋلدىعىن اشۋ جونىندە شەشىم قابىلدادى. قازاقستاننىڭ قۇرمەتتى كونسۋلىنىڭ مىندەتىن اتقارۋ ۆارنا تۇرعىنى يۆان يۆانوۆقا جۇكتەلدى.

2018 -جىلى سوفيا قالاسىنىڭ ەڭ كورىكتى جەرلەرىنىڭ بىرىندە، بولگاريا داڭعىلىنىڭ جانىندا استانا كوشەسى پايدا بولدى.