قازاقپارات كۇنتىزبەسى: 29- ماۋسىم
اتاۋلى كۇندەر
حالىقارالىق تروپيكا كۇنى
بۇل كۇندى تروپيكالىق اۋماقتاردا كەزدەسەتىن قيىندىقتاردىڭ بارلىق دەڭگەيلەرىندە جانە بەيبىتشىلىك ايماعىنا اسەر ەتەتىن پروبلەمالاردىڭ ۇزاققا سوزىلعان سالدارلارىمەن تانىسۋ ءۇشىن بىرىككەن ۇلتتار ۇيىمىنىڭ باس اسسامبلەياسى قۇرعان.
سونىمەن قاتار، ول تروپيكالىق ەلدەردىڭ تۇراقتى دامۋى ماقساتتارى مەن باعىتتارىنا جەتۋىندە ماڭىزدى ءرولدى ايقىنداۋعا باعىتتالعان.
ەستە قالار وقيعالار
1964-جىلى «ماقات - اقتاۋ» تەمىر جولىنىڭ قۇرىلىسى اياقتالدى.
1992-جىلى قازاقستان رەسپۋبليكاسى مەن ۆەتنام سوتسياليستىك رەسپۋبليكاسى، قازاقستان رەسپۋبليكاسى مەن شري-لانكا رەسپۋبليكاسى، قازاقستان رەسپۋبليكاسى مەن گۆينەيا رەسپۋبليكاسى اراسىندا ديپلوماتيالىق قارىم-قاتىناس ورناتۋ تۋرالى نوتا الماستىرىلدى.
1998-جىلى تاراز مەملەكەتتىك ۋنيۆەرسيتەتىندە XVI عاسىردا ءومىر سۇرگەن بەلگىلى تاريحشى، ادەبيەتشى، فيلوسوف، «تاريحي راشيديدىڭ» اۆتورى مۇحامەد حايدار دۋلاتيگە ءمۇسىنتاس قويىلدى.
2001-جىلى ق ر پرەزيدەنتىنىڭ «استانا - جاڭا قالا» ارنايى ەكونوميكالىق ايماعىن قۇرۋ تۋرالى» جارلىعى شىقتى.
2009-جىلى قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ استانانىڭ بولاشاق مەشىتى قۇرىلىسىنىڭ ورنىنا ەسكەرتكىش كاپسۋلاسىن ورنالاستىردى جانە ونى «ازىرەت سۇلتان» دەپ اتادى.
مەشىتتىڭ ساۋلەت جوباسىنىڭ بايگەسىنە 26 جۇمىس تۇسكەن. سونىڭ ەڭ ۇزدىگى بولىپ «KAZGOR» جوبالاۋ اكادەمياسى تاڭدالعان.
2010-جىلى ماڭعىستاۋ وبلىسىنداعى باۋتينو پورتىندا رەسپۋبليكاداعى جالعىز كەمە جوندەيتىن زاۋىت ىسكە قوسىلدى.
2011-جىلى قازاقستاندا ەلىمىزدىڭ يسلام كونفەرەنتسياسى ۇيىمىنا ءتوراعالىق ەتۋىنە ارنالعان نومينالى 1000 تەڭگە بولاتىن ەستەلىك بانكنوتتار شىعارىلدى. بانكنوتتىڭ الدىڭعى جاعىندا «يسلام كونفەرەنتسياسى» ۇيىمىنىڭ لوگوتيپى جانە قازاقستاننىڭ تۇركىستان قالاسىندا ورنالاسقان قوجا احمەت ياسساۋي كەسەنەسىنىڭ كۇمبەزى بەينەلەنگەن. كەلەسى جاعىندا كەسەنەنىڭ جالپى كورىنىسى ورنالاستىرىلعان.
2015-جىلى تاتارستان رەسپۋبليكاسىنداعى قازاقتاردىڭ ۇلتتىق-مادەني اۆتونومياسىنىڭ ءتوراعاسى س. جاقسىبايەۆتىڭ ءوتىنىشحاتى مەن قازاننىڭ مۋنيتسيپيالدىق توپونيميكا جونىندەگى كوميسسياسىنىڭ ۇسىنىمدارىنا سۇيەنە وتىرىپ، قالا اكىمدىگى ۆاحيتوۆسكي جانە پريۆولجسكي اۋداندارىنىڭ اۋماعىنداعى ەسپەرانتو كوشەسىن نۇرسۇلتان نازاربايەۆتىڭ اتىنا وزگەرتتى. كوشەدەگى مەكەنجايدىڭ نومىرلەرى سول كۇيى ساقتالىپ قالدى.
2017-جىلى نۇرسۇلتان نازاربايەۆ حالىقارالىق اۋەجايىنىڭ جاڭا تەرمينالىنداعى VIP- لاۋندج ءوز جۇمىسىن باستادى. وندا جولاۋشىلارعا ۇلكەن كەڭىستىك، ءتۇرلى جەڭىل تاماقتارى بار فۋرشەتتىك ۇستەل جانە باسقا قوسىمشا سەرۆيستەر ۇسىنىلادى. بيزنەس لاۋندج حالىقارالىق تەرمينالدىڭ ءۇش قاباتىندا ورنالاسقان، اۋدانى 1250 شارشى مەتردى قۇرايدى.
بۇل كوپتەگەن قوناقتاردى جايعاستىرۋعا مۇمكىندىك بەرەدى. وندا كومپيۋتەرلەرى بار جۇمىس ورنى، كەلىسسوزدەر جۇرگىزۋگە ارنالعان ارنايى بولمە، دۋش بولمەلەرى، سونىمەن قاتار رەيستەردى كۇتۋ بارىسىندا ۋاقىت وتكىزۋ ءۇشىن دەمالۋعا جايلى ورىندار بار. بۇدان باسقا، جولاۋشىلارعا تاۋلىك ۋاقىتىنا بايلانىستى ءتۇرلى تاعامدار (تاڭعى، تۇسكى جانە كەشكى اس) مەن سۋسىندار ۇسىنىلاتىن بولادى.
2018-جىلى شىعىس قازاقستان وبلىسىنىڭ جارما اۋدانىندا دومبىراعا ارنالعان ەسكەرتكىش قويىلدى. ەسكەرتكىشتىڭ بيىكتىگى - 7 مەتر، ۇزىندىعى - 3 مەتر. اۆتورى جاس ءمۇسىنشى - نۇربول قاليەۆ.
اۋدان اكىمى نۇرلان سىدىقوۆ سالتاناتتى شارادا ءسوز سويلەپ، ەسكەرتكىشتىڭ ۇلتتىق مۇرانى جاڭعىرتىپ، ءتول ونەرىمىزدىڭ ناسيحاتتالىنۋىنا بار كۇشىن سالاتىنىن ايتتى.
2018-جىلى جەنيەۆادا (شۆەيتساريا) قازاقستان رەسپۋبليكاسى ۇكىمەتى مەن يادرولىق زەرتتەۋلەر جونىندەگى ەۋروپالىق ۇيىمنىڭ (CERN) عىلىمي- تەحنيكالىق ىنتىماقتاستىق جونىندەگى حالىقارالىق ىنتىماقتاستىعى تۋرالى كەلىسىمگە قول قويىلدى.
قازاقستاننىڭ CERN شەڭبەرىندە عىلىمي ىنتىماقتاستىعى ءبىزدىڭ ەلىمىزدىڭ الەمدىك قوعامداستىقتا وڭ ءيميدجىن ۇستاپ تۇرۋ ءۇشىن ۇلكەن ماڭىزعا يە، بۇل ەلدىڭ عىلىمي جانە يننوۆاتسيالىق الەۋەتىن دامىتۋعا اسەر ەتەتىنىن اتاپ ءوتۋ كەرەك.
ءوزارا ىنتىماقتاستىقتى نىعايتۋ جونىندەگى كەلىسىم قولدانىستاعى كەلىسىمدى نىعايتىپ، عالىمداردىڭ، ينجەنەرلەردىڭ، ستۋدەنتتەر مەن تەحنيكالىق مامانداردىڭ قازاقستاننان CERN زەرتتەۋ جوبالارىنا ۇزاق مەرزىمدى نەگىزدە قاتىسۋىنا مۇمكىندىك بەرەتىن بازانى قۇرۋ ماقساتىن كوزدەدى.