مەشىتتەر 29-مامىردان باستاپ اشىلادى

انكارا. قازاقپارات - تۇركيادا 23-26- مامىر ارالىعىندا كوممەندانتتىق ساعات ەنگىزىلەدى، دەپ حابارلايدى قازاقپارات انادولى اگەنتتىگىنە سلىتەمە جاساپ.

تۇركيا پرەزيدەنتى رەجەپ تايىپ ەردوعان ەلدىڭ كوروناۆيرۋسپەن قولدان كەلگەنشە كۇرەسىپ جاتقانىن جەتكىزدى.

ونىڭ ايتۋىنشا، ەل بيلىگى 5,5 ميلليوننان استام از قامتىلعان حالىققا قارجىلاي كومەك كورسەتكەن.

تۇرىك كوشباسشىسى ازاماتتارعا الەۋمەتتىك اراقاشىقتىقتى ساقتاۋ قاجەتتىگىن ەسكە سالدى.

ايتپەسە اۋرۋ قايتا ءورشيدى، ول جاعدايدا شەكتەۋ شارالارىن قايتادان قاتاڭداتۋعا تۋرا كەلەدى. ونىڭ سوزىنشە، بيلىك كوروناۆيرۋستىڭ تارالۋىنا قارسى كومەندانتتىق ساعات ەنگىزۋدى جالعاستىرا بەرەدى. مۇنداي شارا 23-26- مامىر ارالىعىندا بۇكىل ەل اۋماعىندا تاعى ەنگىزىلەدى. ودان بولەك، ەپيدەمياعا بايلانىستى 15 پروۆينتسيادا كىرىپ-شىعۋعا قويىلعان شەكتەۋ تاعى 15 كۇنگە ۇزارتىلادى.

«29- مامىردان باستاپ مەشىتتەردىڭ جۇمىسى بىرتىندەپ قالپىنا كەلە باستايدى. Covid-19 - بۇكىل الەمدىك قاتەر. پروبلەما جاھاندىق دەڭگەيدە شەشىلگەندە عانا بۇل قاتەردەن قۇتىلامىز»، - دەپ اتاپ ءوتتى ەردوعان.

ونىڭ ايتۋىنشا، تۇركيا پاندەميانىڭ اياقتالۋىن كۇتەمىن دەپ شەكاراسىن تولىق جاۋىپ، كۇندەلىكتى تىرشىلىكتى توقتاتىپ قويىپ، جىلدار بويى وتىرا المايدى.