قازاقستاندىق پوليتسەيلەر قازا بولعان اتىراۋلىق ارىپتەسىنىڭ وتباسىنا 29 ميلليون تەڭگە جينادى

«اتىراۋ وبلىستىق پوليتسيا دەپارتامەنتىنىڭ، ءى ءى م ورتالىق اپپاراتىنىڭ، وڭىرلىك پوليتسيا دەپارتامەنتتەرىنىڭ، قىلمىستىق-اتقارۋ جۇيەسى ورگاندارى مەن قۇتقارۋ قىزمەتتەرىنىڭ قىزمەتكەرلەرى جانە ۇلتتىق گۆارديانىڭ اسكەري قىزمەتشىلەرى شالقار اقىمعاليەۆتىڭ وتباسىنا قولداۋ كورسەتتى جانە قولداۋدى جالعاستىرا بەرەتىن بولادى. 2- ءساۋىر كۇنى 25 جاسقا تولۋى ءتيىس بولعان پوليتسەي جايىق وزەنىنە باتىپ بارا جاتقان ايەلدى قۇتقارامىن دەپ كوز جۇمدى. وسى ۋاقىتتا ارنايى بانك شوتىنا پوليتسيا قىزمەتكەرلەرى ەرىكتى تۇردە جيناعان 29 ميلليون تەڭگە ءتۇستى»، - دەدى وبلىستىق پوليتسيا دەپارتامەنتى باسپا ءسوز قىزمەتىنىڭ باسشىسى نازىمگۇل قايساعاليەۆا.

بۇعان دەيىن حابارلانعانداي، پوليتسەيلەر وتباسىنىڭ جالعىز اسىراۋشىسى بولعان ارىپتەسىنىڭ ءۇي-ىشىنە اتىراۋدان ءۇش نەمەسە ءتورت بولمەلى پاتەر الىپ بەرۋدى جوسپارلاۋدا.

ەستەرىڭىزگە سالا كەتسەك، بيىلعى 21- ناۋرىز كۇنى اتىراۋ قالاسىندا پاترۋلدىك پوليتسيا سەرجانتى شالقار اقىمعاليەۆ كوپىردەن جايىق وزەنىنە سەكىرگەن ايەلدى قۇتقارماق بولىپ ءوزى اجال قۇشتى.

ق ر ىشكى ىستەر ءمينيسترى ەرلان تۇرعىمبايەۆ پوليتسەيدىڭ جانۇياسىن قاراۋسىز قالدىرمايتىنىن ءمالىم ەتتى.

ەرلىكپەن قازا تاپقان شالقار اقىمعاليەۆ مەملەكەتتىك ناگراداعا ۇسىنىلدى.