قىرعىزستاندا 29 جاستاعى كەلىنشەك ەڭ جاس باتىر انا اتاندى - فوتو
ءتۇپ اۋدانىنىڭ تۇرعىنى ايدانا تاقىرباشەۆا مەن ونىڭ 38 جاستاعى كۇيەۋى جىرعالبەك وروزوۆ 31 قاڭتار كۇنى جەتىنشى ءسابيلى بولدى. اۋدان اكىمى سوۆەتبەك يسمايلوۆ كوپبالالى جاس وتباسىن قۇتتىقتاپ، كونۆەرت سىيلادى.
«قازىرگى جاستاردىڭ اتا-انا بولىپ، كوپ بالا تۋۋعا اسىعاتىنىن كورىپ، قۋانامىن. ءوز زامانداستارىڭىزعا جاقسى ۇلگى كورسەتكەندەرىڭىز ءۇشىن العىس ايتامىن»، - دەدى اكىم. قازىر ۇيدە قالعان بالالارعا ناعاشى اجەلەرى باس- كوز بولۋدا. وتباسىنىڭ كەنجەسى 1 جاستا. تۇڭعىش ۇل نۇرەل - اتا-اناسىنىڭ قولقاناتى. ەكىنشى سىنىپ وقۋشىسى وزىنەن كەيىنگى باۋىرلارىنا قاراپ، ەڭ كىشى ىنىسىنە ءسۇت جىلىتىپ بەرەدى.
«مەن مەملەكەتتىك قىزمەتتە ىستەمەيمىن، ءوزىمنىڭ كىشىگىرىم شارۋاشىلىعىم بار. ءوزىم ۇيدە سەگىزىنشى بالا بولعانمىن. توعىز جىل بۇرىن شاڭىراق كوتەردىك»، - دەدى ايدانانىڭ كۇيەۋى جىرعالبەك. ازىرگە ايدانا پەرزەنتحانادا جاتىر، ال جىرعالبەك سيىرلاردى ساۋىپ، بالالاردىڭ كيىمىن جۋىپ، تاماعىن ازىرلەپ ءجۇر. ۇلگىلى جانە كوپبالالى وتباسىن جەرگىلىكتى كەڭەس دەپۋتاتتارى، ارال اۋىلىنىڭ تۇرعىندارى مەن تۋىستارى قۇتتىقتاپ جاتىر.
جەرگىلىكتى بيلىك ورگاندارى مەن دەپۋتاتتار سابيگە جاڭا اربا ساتىپ اپەرىپ، ۇيگە كومىر مەن قىستىق وتىن جەتكىزۋدى قولعا الدى. ايدانا مەن جىرعالبەكتىڭ بالالارى: - نۇرەل - 8 جاستا، 2-سىنىپ وقۋشىسى؛ - ەگىزدەر ەلناز جانە گۇلناز - 6 جاستا؛ - ديلناز - 5 جاستا؛ - دانيار - 4 جاستا؛ - دايىر - 1 جاستا جاڭا تۋعان قىز بالاعا ءالى ەسىم تاڭدالماعان.
ەسكە سالا كەتسەك، ەلىمىزدەگى ەڭ جاس كوپ بالالى انا قىزىلوردا وبلىسىندا تىركەلدى. 27 جاستاعى دينارا ماناتبەك قىزى جەتى بالانى دۇنيەگە اكەلىپ، باتىر انا اتانعان بولاتىن. ول جارى رەنات ابدىباي ۇلىمەن بىرگە ءۇش ۇل، ءتورت قىز تاربيەلەپ وتىر.
