قازاقستاندا وقۋشىلار قوسىمشا 29 كۇن دەمالىس الادى

الماتى. قازاقپارات - بۇگىن الماتىدا وتكەن «عىلىم مەن بيزنەس» عىلىمي فورۋمىندا ق ر ءبىلىم جانە عىلىم ءمينيسترى ەرلان ساعاديەۆ 5 كۇندىك وقىتۋ جۇيەسى تۋرالى ءتۇسىندىرىپ ءوتتى.

ونىڭ ايتۋىنشا، جاڭا وقۋ باعدارلاماسىنداعى 5 كۇندىك وقۋ وقىتۋ جۇيەسى وقۋشىلارعا قوسىمشا 1,5 اي دەمالىس بەرەدى.

«ءبىز بالالارعا قوسىمشا 34 كۇن دەمالىس بەرەمىز. بۇل بارلىق سەنبىلەردى قوسا العاندا. ەندى وقۋ مەرزىمىن 1 ماۋسىمعا دەيىن سوزىپ جاتىرمىز. ياعني، 5 كۇندى العاندا بارلىعى 29 كۇن (جازعى دەمالىستان بولەك) اتا- انالار مەن بالالار دەمالادى»، - دەدى ە. ساعاديەۆ.

 جاڭا باعدارلاما بويىنشا ءار ءپان قازاق، ورىس جانە اعىلشىن تىلدەرىندە وتەدى. باعدارلاما نازاربايەۆ زياتكەرلىك مەكتەبىندە سىناقتان ءوتتى.

 بيىل ءبىرىنشى كلاستار، 2017 - جىلى 2,5,7 كلاستار كوشەدى. بارلىعى جاڭا وقىتۋ جۇيەسى 350 مىڭ وقىتۋشى مەن 3 ميلليون بالانى قامتيدى.

«ءبىز زاماناۋي باعارلامانىڭ يگىلىگىن كورۋگە مىندەتتىمىز. بيىلدىڭ وزىندە 75 مىڭ وقىتۋشى جاڭا باعدارلامامەن وقىتىلادى»، - دەدى مينيستر.