جاڭا جىلدان باستاپ دارىگەرلەر مەن ۇستازداردىڭ جالاقىسى 29 پايىزعا دەيىن وسەدى - ت. دۇيسەنوۆا

استانا. قازاقپارات - جاڭا جىلدان باستاپ دەنساۋلىق ساقتاۋ سالاسىنداعى قىزمەتكەرلەردىڭ ەڭبەكاقىسى 7 پايىزدان 28 پايىزعا دەيىن، ۇستازداردىڭ ەڭبەكاقىسى 15 پايىزدان 29 پايىزعا دەيىن، مادەنيەت، سپورت سالاسىندا، اۋىل شارۋاشىلىعىندا ەڭبەك ەتىپ جۇرگەن ازاماتتاردىڭ جالاقىسى ورتاشا ەسەپپەن 40 پايىزعا دەيىن وسەدى.

بۇل تۋرالى بۇگىن استانا قالاسىنىڭ اكىمدىگىندە جۇمىسشى توپقا جاڭا ەڭبەك كودەكسىنىڭ نورمالارىن تۇسىندىرە وتىرىپ، دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا ءمالىم ەتتى.

«2016 -جىلدىڭ 1 -قاڭتارىنان باستاپ ازاماتتىق قىزمەتشىلەردىڭ جاڭا ەڭبەكاقى جۇيەسىن ەنگىزلگەلى وتىرمىز. بۇل جۇيەنى ەنگىزۋ - مەملەكەت باسشىسىنىڭ تاپسىرماسى. وسى جاڭا جۇيەگە سايكەس، دەنساۋلىق ساقتاۋ سالاسىنداعى قىزمەتكەرلەردىڭ ەڭبەكاقىسى 7 پايىزدان 28 پايىزعا دەيىن، ال ءبىلىم سالاسىندا جۇمىس ىستەيتىن ازاماتتاردىڭ ەڭبەكاقىسى 15 پايىزدان 29 پايىزعا دەيىن، مادەنيەت، سپورت سالاسىندا، اۋىل شارۋاشىلىعىندا ەڭبەك ەتىپ جۇرگەن ازاماتتاردىڭ جالاقىسى ورتاشا ەسەپپەن  40 پايىزعا دەيىن وسەدى»، - دەدى جۋرناليستەردىڭ سۇراعىنا جاۋاپ بەرگەن مينيستر.

ت. دۇيسەنوۆانىڭ ايتۋىنشا، ەڭبەكاقى تولەۋدىڭ جاڭا جۇيەسى الەۋمەتتىك قىزمەتكەرلەردى ءتورت كاتەگورياعا ءبولىپ قاراستىرادى.

«جالپى، بۇل جۇيە 2010 -جىلدان باستاپ دايىندالعان جۇيە. جۇيە ناقتى قانداي وزگەرىستەر اكەلدى دەگەنگە كەلسەك، قازىر قولدانىستاعى جۇيەدە دارىگەر بولسىن، مۇعالىم بولسىن، الەۋمەتتىك قىزمەتكەر بولسىن، ولاردىڭ ەڭبەك ءوتىلى بىردەي بولسا، ولار ءبىر كاتەگوريادا تۇراتىن. ياعني، ەڭبەكاقىسى بىردەي ەسەپتەلەتىن. ءبىراق ءار سالانىڭ ءوز ەرەكشەلىگى بار، جۇمىستىڭ كولەمى بار. سوندىقتان جاڭا جۇيەگە سايكەس، ەڭبەكاقىنى ءبىز ءتورت فۋنكسيونالدى بلوكقا بولدىك. ياعني، ءبىلىم سالاسىن ءبىر بلوكقا، دەنساۋلىق سالاسىن باسقا بلوكقا بولدىك»، - دەپ ءتۇسىندىردى مينيستر.

اۆتور: كەنجەكەي توقتامۇرات قىزى