09:05, 28 - شىلدە 2014 | GMT +5
اپاتقا ۇشىراعان ميگ-29 ۇشقىشى ۇشاقتى قۇتقارماق بولىپ قازا تاپتى
استانا. قازاقپارات - استراحان تۇبىندە اپاتقا ۇشىراعان ميگ-29 ۇشاعىنىڭ ۇشقىشى اۋە كەمەسىن قۇتقارماق بولىپ، قازا تاپتى، دەپ حابارلادى شەتەلدىك ب ا ق.
«ۇشۋلار قولباسشىلىعى ۇشقىشقا ۇشاقتى تاستاپ شىعۋعا بۇيرىق بەرگەن ەدى. الايدا، ول اۋە كەمەسىن قۇتقارۋعا ارەكەت جاساپ، مەرت بولدى»، - دەپ حابارلادى ر ف قورعانىس مينيسترلىگىنىڭ رەسمي وكىلى، گەنەرال- مايور يگور كوناشەنكوۆ.
جويعىش ۇشاق ۇيلەردەن قاشىق ايماققا قۇلاپ، جەرگىلىكتى تۇرعىندار زارداپ شەككەن جوق. ۇشاق قۇلاعاننان كەيىن شىققان ءورتتى سوندىرۋگە 30 دان استام ءورت ءسوندىرۋشى مەن جەتى تەحنيكا جۇمىلدىرىلدى. اپات ورنىنا رەسەي قورعانىس مينيسترلىگىنىڭ كوميسسياسى اتتاندى.
ايتا كەتەيىك، ۇشاق استراحاننان 30 شاقىرىم جەردە جوسپارلى وقۋ-جاتتىعۋ ۇشۋلارىن ورىنداۋ كەزىندە اپاتقا ۇشىراعان ەدى.
اۆتور: مارلان جيەمباي
