ۇرىمجىدەگى تەراكتقا قاتىسى بار دەگەن كۇدىكپەن 29 ادام ۇستالدى
ولارعا سەپاراتيزم، كەمسىتۋشىلىك جانە ەتنوسارالىق قاقتىعىستى تۋدىردى دەگەن ايىپ تاعىلدى.
ەسكە سالا كەتەيىك، 22 - مامىردا ءۇرىمجى قالاسىنداعى بازارلاردىڭ بىرىندە بولعان تەراكت سالدارىنان 39 ادام قازا تاۋىپ، 94 ازامات جاراقات الدى. وسىعان دەيىن، 30 - ساۋىردە شينجاڭ ۇيعىر اۆتونوميالىق ولكەسىندە تەمىرجول ۆوكزالىندا جارىلىس پەن پىشاق سالۋ سالدارىنان 3 ادام كوز جۇمدى، 79 ادام جاراقات الدى.
شينجاڭداعى ءبىرقاتار لاڭكەستىك ۋاقيعادان كەيىن قىتاي بيلىك وكىلدەرى 23 - مامىردا شينجاڭ ۇيعىر اۆتونوميالىق ولكەسىندە تەرروريستىك وپەراتسياعا قارسى رەجىم ەنگىزگەن. ول ءبىر جىلعا دەيىن سوزىلادى.
شينجاڭداعى تەراكتتار جۇيەسى وتكەن جىلدىڭ قازان ايىندا بەيجىڭدەگى تيانانمىن الاڭىندا 3 لاڭكەستىڭ تۋريستەر شوعىرلانعان جەرگە كولىكپەن كىرىپ، ونى جارعاندارىنان باستالدى. ونىڭ سالدىرىنان 3 تەرروريست پەن 2 تۋريست كوز جۇمعان ەدى.
سونداي-اق، 2014 - جىلى ناۋرىزدا قىتايدىڭ وڭتۇستىك-باتىسىنداعى يۋننان پروۆينسياسىنىڭ كۋنميڭ قالاسىنىڭ ساپارجايىندا بولعان وقيعانى اتاپ كەتۋگە بولادى. ول كەزدەگى پىشاقپەن جاساعان شابۋىلدان 29 جەرگىلىكتى تۇرعىن اجال قۇشىپ، 140 تان استامى جاراقاتتاندى.
