كەلىنىن باسىنان ۇتىكپەن 29 رەت ۇرعان 86 جاستاعى زەينەتكەرگە ءبىر جىل شارتتى جازا بەرىلدى
وسىعان دەيىن كەلىنىن ولتىرگەن قاريانىڭ پوليتسيانى ءوزى شاقىرتىپ، قىلمىسى جايىندا بايانداپ بەرگەنى حابارلانعان ەدى. كەمپىردىڭ ايتۋىنشا، ونىڭ ادام توناۋ بويىنشا بىرنەشە رەت سوتتى بولعان بالاسى مەن ونىڭ بىرگە تۇراتىن ايەلى ولارعا ءوز پاتەرىن سىيعا تارتۋدى ارمانداعان. بالاسى مۇنى بىرنەشە رەت قورقىتىپ، كوڭىلدەسى الەنا تكاچەنكوعا دا سولاي ەتۋدى تاپسىرعانىن ايتتى.
ەسكە سالا كەتەيىك، وقيعا كەمپىردىڭ بالاسى جۇمىسقا كەتىپ، ول كەلىنىمەن جالعىز قالعاندا بولعان. زەينەتكەردىڭ ايتۋىنشا، ول ءدارى ءىشىپ، ۇيىقتاپ قالادى. كەيىن كەۋدەسىنە بىرەۋدىڭ قولى تيگەنىن سەزىپ ويانادى. ونىڭ الدىندا قولىنا پىشاق العان كەلىنى تۇرادى. كەلىنى ونى پىشاقتاعىسى كەلەدى، ءبىراق كەمپىر وعان قارسىلىق كورسەتەدى. سول كەزدە قاريا قولىنا ىلىنگەن ۇتىكپەن قارسىلاسىنىڭ باسىنان ەسى تانعانشا ۇرا بەرەدى. بۇدان كەيىن زەينەتكەر شارشاعاننان ۇيىقتاپ قالادى. ۇيقىدان ويانىپ، بولعان وقيعانى ەسىنە العان ول پوليتسياعا حابار بەرگەن.
قوستاناي وبلىستىق سوتىنىڭ رەسمي سايتىندا جاريالانعان مالىمەتكە سايكەس، كەلىنى مۇگەدەكتىگى بولعاندىقتان جانە پسيحياتردىڭ ەسەبىندە تۇرعاندىقتان ەش جەردە جۇمىس ىستەمەگەن. "تەرگەۋ كەزىندە جانە كەيىن سوتتا انىقتالعانداي، اجە سول ۋاقىتتا كوپ ۋاقىت بويى قورلانىپ، كەلىنىنىڭ كەمسىتۋى مەن قورقىتۋلارىنان فيزيولوگيالىق اففەكت جاعدايىندا بولعان.
زينايدا ۆاسيەۆا قاساقانا كىسى ءولتىرۋ ماقساتىندا ەمەس، ءوز ىسىنە تولىقتاي جاۋاپ بەرە الاتىن جاعدايدا بولماي تۇرعاندا تكاچەنكونىڭ باسىنا ۇتىكپەن 29 رەت سوققى جاساعان"، - دەپ حابارلادى وبلىستىق سوتتىڭ وكىلدەرى.
رۋدنىي قالالىق سوتى زينايدا ۆاسيەۆانى "اشۋ-ىزا ۇستىندە كىسى ءولتىرۋ" بابى بويىنشا قىلمىس جاساۋعا ايىپتى دەپ تانىپ، وعان ءبىر جىل سىناق مەرزىمىمەن شارتتى تۇردە جازا كەستى. سوت ۇكىمى زاڭدى كۇشىنە ەندى.
