فۋتبولدان ەۋروپا چەمپيوناتى: دانيا 29 جىلدا العاش رەت 1/2 فينالعا شىقتى
ەكى قۇراما بۇعان دەيىن 11 مارتە كەزدەستى. ونىڭ 3 دە چەحيا باسىم ءتۇسىپ، 2 دە دانيا جەڭسە، قالعانىندا تەڭ ەسەپ تىركەلدى. سوڭعى رەت چەحيا دانيانى 2004-جىلدىڭ 27- ماۋسىمىندا ەۋروپا چەمپيوناتىنىڭ 1/4 فينالىندا 3:0 ەسەبىمەن جەڭگەن بولاتىن.
سودان بەرگى التى كەزدەسۋدىڭ بەسەۋىندە تەڭ ەسەپ تىركەلىپ، بىرەۋىندە دانيا جەڭىسكە جەتتى.
بۇگىنگى كەزدەسۋدە ەكەۋىنىڭ دە جەڭىسكە جەتۋ مۇمكىندىگى بىردەي بولدى. دەگەنمەن العاشقى ەكى گولدى دانيالىقتار سوقتى. ويىننىڭ 5-مينۋتىندا توماس ديلەيني مەرگەندىك تانىتسا، 42-مينۋتتا كاسپەر دولبەرگ ەسەپتى ۇستەمەلەي ءتۇستى.
ەكىنشى كەزەڭ باستالعاننان چەحتار العا قاراي ۇمتىلدى. ولاردىڭ قاتارىنان پاتريك شيك 49-مينۋتتا ەسەپ ايىرماسىن قىسقارتتى. ول - فۋتبولشىنىڭ قۇرلىقتىق دودا بارىسىندا سوققان بەسىنشى گولى.
سۇرمەرگەندەر كوشىندە وسىلايشا پورتۋگالدىق كريشتيانۋ رونالدۋمەن تەڭەستى. ناتيجەسىندە دانيا قارسىلاسىن 2:1 ەسەبىمەن جەڭىپ، جارتىلاي فينالعا جولداما الدى.
ەسكە سالساق، بۇدان بۇرىن قۇرلىقتىق دودادا 1992-جىلى چەمپيوندىق اتاققا قول جەتكىزگەن ەدى.
سودان بەرگى ۋاقىتتا جارتىلاي فينالعا شىققان ەمەس. وسىلايشا 29 جىل بۇرىنعى جەتىستىگىن قايتالاۋعا جاقىنداپ كەلەدى.
جارتىلاي فينال ويىندارى 6- جانە 7- شىلدە كۇندەرى وتەدى. الدىمەن 6- شىلدەدە يتاليا مەن يسپانيا شەبەرلىك بايقاسادى. ال 7- شىلدەدە ۋكراينا مەن انگليا جۇبىنىڭ جەڭىمپازىمەن كەزدەسەدى.
فينال 11- شىلدەدە انگليا استاناسى لوندون قالاسىنداعى «ۋەمبلي» ستاديونىندا وتەدى.
