ميكروقارجى ۇيىمدارى 28 مىڭ بورىشكەردىڭ بەرەشەگىن تولىق كەشىرەدى
استانا. قازاقپارات - ميكروقارجى ۇيىمدارى 432 مىڭ قارىز الۋشىنىڭ پروبلەمالىق بەرەشەگىن قايتا قۇرىلىمدايدى.
بۇل تۋرالى ق ر قارجى نارىعىن رەتتەۋ جانە دامىتۋ اگەنتتىگى ءتوراعاسىنىڭ ءبىرىنشى ورىنباسارى نۇرلان ءابدىراحمانوۆتىڭ ءماجىلىس دەپۋتاتتارىنىڭ ساۋالىنا بەرگەن جاۋابىندا ايتىلعان، دەپ حابارلايدى قازاقپارات ءتىلشىسى.
«اگەنتتىك جىل باسىندا كەپىلسىز ونلاين ميكروكرەديت بەرۋ سەگمەنتىندەگى 30 ميكروقارجى ۇيىمىنان ازاماتتاردىڭ پروبلەمالىق ميكروكرەديتتەرىن تومەندەتۋ جونىندەگى جەكە جوسپارلارىن تالاپ ەتتى. ۇسىنىلعان جەكە جوسپارلار اياسىندا 2022 -جىلدىڭ سوڭىنا دەيىن ميكروقارجى ۇيىمدارى 33,1 ميلليارد تەڭگە سوماسىنا 432 مىڭ قارىز الۋشىنىڭ پروبلەمالىق بەرەشەگىن قايتا قۇرىلىمداۋدى، 0,8 ميلليارد تەڭگە سوماسىنا 107 مىڭ قارىز الۋشىنى ءىشىنارا كەشىرۋ جانە 0,6 ميلليارد تەڭگە سوماسىنا 28 مىڭ قارىز الۋشىنى تولىق كەشىرۋ جوسپارلاعان»، - دەدى نۇرلان ءابدىراحمانوۆ.
اگەنتتىك وكىلىنىڭ مالىمەتىنشە، 2022 -جىلدىڭ 1-قازانىنا ميكروقارجى ۇيىمدارى 285,5 مىڭ قارىز الۋشىعا قاتىستى پروبلەمالىق بەرەشەكتى تومەندەتۋ جونىندەگى ءىس- شارالاردى جۇزەگە اسىردى.
«ونىڭ ىشىندە نەگىزگى بورىش پەن سىياقى بويىنشا 66,4 مىڭ قارىز الۋشىنىڭ 585 ميلليارد تەڭگە بەرەشەگى، 756 ميلليارد تەڭگە تۇراقسىزدىق ايىبى تولىق جانە ءىشىنارا كەشىرىلدى. 4,8 ميلليون تەڭگە مولشەرىندە تۇراقسىزدىق ايىبى ەسەپتەن شىعارىلا وتىرىپ، 15,3 ميلليارد تەڭگە سوماعا 219,9 مىڭ بورىشكەردىڭ ميكروكرەديتى قايتا قۇرىلىمدالدى. اگەنتتىك جەكە جوسپارلاردىڭ ورىندالۋىن باقىلاۋدى جالعاستىرادى»، - دەدى نۇرلان ءابدىراحمانوۆ.
