كامچاتكادا 28 ادام مىنگەن ۇشاق قۇلاپ، جولاۋشىلار تۇگەل قازا تاپتى

كامچاتكا. تاسس- قازاقپارات - رەسەيدەگى كامچاتكادا جوعالعان ان-26 جولاۋشىلار ۇشاعىنىڭ قالدىقتارى تابىلدى، دەپ حابارلايدى قازاقپارات ت ا س س اگەنتتىگىنە سىلتەمە جاساپ.

بۇل جايىندا اقپارات اگەنتتىگىنە «كامچاتكا اۋە كاسىپورنى» كومپانياسىنىڭ باس ديرەكتورى الەكسەي حرابروۆ ءمالىم ەتتى.

«ءيا، ۇشاق قالدىقتارى تابىلدى. قاي جەردە جانە قانداي جاعدايدا تابىلعانىن ايتا المايمىن. وقيعا ورنىنا تاڭەرتەڭ ۇشاق پەن تىكۇشاق ۇشىپ بارادى» دەدى ول.

توتەنشە جاعدايلار مينيسترلىگىنىڭ مالىمەتىنشە، ۇشاق اۋەجايدان 3,8 شاقىرىم قاشىقتىقتان، پالانا دەگەن ەلدىمەكەنگە جاقىن ماڭنان تابىلعان. اپات بولعان جەرگە 26 قۇتقارۋشى بارا جاتىر. ۇشاق ەندى قونۋعا بەتالعاندا جارتاسقا سوعىلىپ، وحوت تەڭىزىنە قۇلاپ كەتكەن. ەشتەڭە كورىنبەيتىن اۋا رايى جاعدايىندا، بۇيىردەن جەل سوعىپ تۇرعاندا قونۋعا تىرىسقان ۇشقىش جارتاستى بايقاماي قالعان. ايتا كەتەيىك، ۇشاقتا 22 جولاۋشى مەن 6 ەكيپاج مۇشەسى بولعان. ولاردىڭ ەشقايسى امان قالعان جوق.