قازاقپارات كۇنتىزبەسى. 28-قاراشا
اتاۋلى كۇندەر
بۇكىلالەمدىك قامقورلىق كۇنى
وسى مەيرامنىڭ نەگىزىن ءۇندى اقىنى، جۋرناليست، پروديۋسەر، ساياساتكەر، قوعام بەلسەندىسى پريتيش ناندي قالادى.
بۇكىلالەمدىك قامقورلىق كۇنى العاش رەت مۋمبايدا تويلاندى. ول جانۋارلار تاعدىرىنا، جەر بەتىندەگى بۇكىل جاندىك اتاۋلىعا قامقورلىق ەتۋگە، ءورىسى كەڭەيىپ كەلە جاتقان ۆەگەتارياندىقتىڭ ماڭىزدىلىعىنا ارنالادى.
ەستە قالار وقيعالار
1934 -جىلى قازاق ۇلتتىق مادەني عىلىمي- زەرتتەۋ ينستيتۋتى ءوز جۇمىسىن باستادى. قازاق ۇلتتىق مادەني عىلىمي- زەرتتەۋ ينستيتۋتىنىڭ ماقساتى ۇلتتىق مادەني قۇرىلىس سالاسىنداعى بارلىق عىلىمي- زەرتتەۋ جۇمىستارىن ينتەگراتسيالاۋ جانە ۇيلەستىرۋ، قورىتىندىلاپ، عىلىمي- زەرتتەۋ ناتيجەلەرىن ءبىرىڭعاي بازاعا سالۋ، قازاقستانىڭ مادەني ساياساتىنىڭ ىرگەسىن قالاۋ بولدى.
1998 -جىلى ۇلى بريتانيادا قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ «ۋاقىت تۋرالى، تاعدىرلار تۋرالى، ءوزىم تۋرالى» اتتى كىتابى اعىلشىن تىلىندە جارىق كوردى.
2000 -جىلى «قازاقستان مەسەناتتارى كلۋبى» جىل سايىنعى «تارلان» جالپىۇلتتىق تاۋەلسىز سىيلىعىن جاريالادى. سىيلىق ادەبيەت، مۋزىكا، تەاتر، بەينەلەۋ ونەرى، كينەماتوگراف، عىلىم جانە اعارتۋ سەكىلدى جەتى باعىتتا بەرىلەدى.
2005 -جىلى پاۆلوداردىڭ بۇقار جىراۋ اتىنداعى وبلىستىق ادەبيەت جانە ونەر مۇراجايى «جەرگىلىكتى مۇراجايلاردى قولداۋ» اكتسياسىنىڭ بارىسىندا قالا تۇرعىندارى سىيعا تارتقان 418 جاڭا جادىگەرمەن تولىقتى. سىيلىقتاردىڭ اراسىندا ءماديدىڭ تۇتىنعان «قۇرانىن» جانە مۇحتار اۋەزوۆتىڭ 1947 -جىلى جارىق كورگەن «اباي» كىتابىن اتاۋعا بولادى. ولاردىڭ ەكەۋى دە اراب ارىپتەرىمەن باسىلعان. مۇراجايدىڭ كىتاپ قورى پاۆلودارلىق تانىمال قالامگەرلەر مۇزافار الىمبايەۆتىڭ، نۇتفوللا شاكەنوۆتىڭ شىعارمالارىمەن، قۋعىن-سۇرگىن جىلدارى ەرتىس سەلوسىندا تۇرعان ءسىبىر جازۋشىسى ەفيم پەرميتيننىڭ ءتورت تومدىعىمەن، ورىستىڭ بەلگىلى اقىنى مارينا سۆەتايەۆانىڭ ءسىڭلىسى، وتكەن عاسىردىڭ 50-جىلدارى پاۆلوداردا تۇرعان جازۋشى اناستاسيا سۆەتايەۆانىڭ اۆتورلىق قولتاڭباسى بار «ەستەلىكتەر» كىتابىمەن تولىقتى.
مۇراجايعا اتاقتى ءانشى سۋات ابۋسەيىتوۆتىڭ جەكە زاتتارى مەن فوتوسۋرەتتەرى كەلىپ ءتۇستى. ۆارنا قالاسىندا (بولگاريا) وتكەن حالىقارالىق بايقاۋ- فەستيۆالىنىڭ جۇلدەگەرى جاس سۋرەتشى ليليا مەلنيك مۇراجايدىڭ بالالار بولىمىنە كورمەدە كورسەتىلگەن سۋرەتى مەن فەستيۆالدىڭ بۋكلەتىن تارتۋ ەتتى.
2011 -جىلى كورەيا رەسپۋبليكاسى داەدجون قالاسىنىڭ كورەيا يننوۆاتسيالىق كلاستەرى قورىندا كورەيا- قازاقستان تەحنولوگيالىق ىنتىماقتاستىق ورتالىعىنىڭ سالتاناتتى اشىلۋ ءراسىمى ءوتتى.
2011 -جىلى «KazSat-2» سپۋتنيگى قازاقستان رەسپۋبليكاسىنىڭ مەنشىگىنە بەرىلدى. قازاقستان رەسپۋبليكاسى ۇلتتىق عارىش اگەنتتىگى كوميسسياسىنىڭ «KazSat-2» عارىشتىق جۇيەسىن قازاقستان رەسپۋبليكاسىنىڭ مەنشىگىنە بەرۋ جونىندەگى وتىرىسىندا «KazSat-2» عارىشتىق جۇيەسىن مەنشىك قۇقىعىنا الۋ حاتتاماسىن كوميسسيا ءتوراعاسى «ر ع ب و» ا ق ديرەكتورلار كەڭەسىنىڭ ءتوراعاسى، ق ر ۇلتتىق عارىش اگەنتتىگى ءتوراعاسىنىڭ ورىنباسارى ەركىن شايماعامبەتوۆ بەكىتتى.
2013 -جىلى قازاقستان رەسپۋبليكاسى قارۋلى كۇشتەرى قۇرلىق اسكەرلەرىنىڭ باس قولباسشىسى گەنەرال- لەيتەنانت مۇرات مايكەيەۆ «جىل تاڭداۋى - جىل ادامى» حالىقارالىق فەستيۆالىنىڭ قورىتىندىسى بويىنشا «2013 -جىلدىڭ اسكەريى» نوميناتسياسىندا جەڭىسى ءۇشىن «التىن ادام» ستاتۋەتكاسىمەن ماراپاتتالدى.
2017 -جىلى جاپونيا ۇكىمەتى «نەۆادا- سەمەي» حالىقارالىق يادرولىق قارۋعا قارسى قوزعالىستىڭ پرەزيدەنتى ولجاس سۇلەيمەنوۆتى يادرولىق قارۋدى تاراتپاۋ سالاسىنداعى ىنتىماقتاستىق ارقىلى ەكى ەل اراسىنداعى دوستىق قاتىناستاردىڭ دامۋىنا زور ۇلەس قوسقانى ءۇشىن جاپون ۇكىمەتىنىڭ «كۇنشىعىس، التىن شۋاق وردەنىمەن» ماراپاتتالدى. 2008 -جىلى قازاقستان پرەزيدەنتى نۇرسۇلتان نازاربايەۆ «ۇلكەن لەنتاداعى حريزانتەما وردەنىمەن» ماراپاتتالسا، 2006 -جىلى - قازاقستانداعى جاپون تۇتقىنداردىڭ زيراتىن ىزدەۋمەن اينالىسقان تاريحشى اسقانبەك الدانازاروۆ «كۇنشىعىس، التىن شۋاق وردەنىمەن» ماراپاتتالعان.
2017 -جىلى فرانسيانىڭ قازاقستانداعى توتەنشە جانە وكىلەتتى ەلشىسى فيليپپ مارتينە تانىمال قازاق جىرشىسى ۇلجان بايبوسىنوۆاعا «فرانسيا ادەبيەتى مەن ونەرىنىڭ كاۆالەرى» وردەنىن سالتاناتتى تۇردە تابىس ەتتى. فرانسيا ەلشىسى وردەندى الماتىدا وتكەن «ۇلى دالا ەلى» ەتنوفەستيۆالىندە سالتاناتتى تۇردە تاپسىردى. ول فرانسيا مادەنيەت ءمينيسترىنىڭ ارنايى تاپسىرماسىمەن ەۋروپادان جولدانعان قۇرمەتكە قازاق جىرشىسى لايىق ەكەنىن ايتتى.
2018 -جىلى پورت-لۋيستە (ماۆريكي رەسپۋبليكاسى) باس قوسقان ماتەريالدىق ەمەس مادەني مۇرانى قورعاۋ جونىندەگى ۇكىمەتارالىق كوميتەتى تۇركى حالىقتارىنىڭ «قورقىت بابا» ەپوسىن يۋنەسكو ماتەريالدىق ەمەس مۇرالار تىزىمىنە ەنگىزدى.
