تۇركياداعى ونەر فەستيۆالى كەزىندە 28 كيىز ءۇي تىگىلدى

استانا. قازاقپارات - تۇركيادا حالىق ويىندارى مەن مادەنيەت فەستيۆالى ءوتتى. ايتۋلى شارا بيىل ىستامبۇل قالاسىندا  ەكىنشى مارتە ۇيىمداستىرىلىپ وتىر. وعان ەتنو- مادەني بىرلەستىكتەر مەن تۇرىك ەلىنىڭ 7 ايماعىنان كەلگەن سپورت جانە ونەر مايتالماندارى قاتىستى.

 فەستيۆال اياسىندا تۇركياداعى قازاق دياسپوراسى حالقىمىزدىڭ ادەت- عۇرىپتارى مەن سالت- ءداستۇرىن جەرگىلىكتى حالىققا تاماشالاپ كەلگەن شەتەلدىك تۋريستەرگە كورسەتىپ، كەڭىنەن تانىستىردى.

حالىق ويىندارى مەن مادەنيەت فەستيۆالى بيىل 843 سپورتشىنىڭ باسىن قوستى. ولار مانگالا، كوكپار، كۇرەس، جامبى اتۋ مەن ساداق اتۋ، اسىق ويىنى سىندى تۇركى حالىقتارىنىڭ ءداستۇرلى ويىندارىنىڭ 11 تۇرىنەن ب ا ق سىنادى. الايدا جەرگىلىكتى تۇرعىندار ات جارىس، «مايلى كۇرەس» پەن «ابا كۇرەسىن» ەرەكشە قىزىقتاپ وتىردى. وسى جولى ءار ايماقتىڭ نامىسىن قورعاۋعا 300 بالۋان بەلدەسۋگە شىقتى. ونىڭ 45- ءى ەل اۋزىندا جۇرگەن اتاقتى بالۋاندار ەكەن.

 دۋرمۋش وندەر، توكات قالاسىنىڭ تۇرعىنى:

 - فەستيۆالگە اتقا ءمىنۋ ءۇشىن ارنايى كەلدىك. ءبىراق كۇرەس تارتىستى ءوتىپ جاتىر. سوندىقتان سايىستان كوز الماي تاماشالاپ وتىرمىز. ۇيىمداستىرۋشىلارعا العىسىم شەكسىز. ويتكەنى حالقىمىزدىڭ ءداستۇرلى ويىندارىن، مادەنيەتىن جاڭعىرتۋدا ءىس- شارانىڭ ماڭىزى وتە زور. اسىرەسە وسكەلەڭ ۇرپاق ۇلتتىق قۇندىلىقتارىمىزدى بويىنا ءسىڭىرىپ، وعان بارىنشا قامقورلىق تانىتىپ وتىرعاندىعى كوڭىلگە مەدەۋ بولدى.

جۇزدەن جۇيرىك، مىڭنان تۇلپار اتانۋعا اركىمنىڭ- اق تالاسى بار. سەبەبى سايىس جەڭىمپازدارىن باعالى سىيلىقتار مەن حالىقتىڭ ىستىق ىقىلاس- قۇرمەتى كۇتىپ تۇر. مۇندا قۇرالايدى كوزگە اتار مەرگەندەر دە ىرىكتەلىپ قالدى. نىسانا كوزدەۋدەن ىستامبۇلدىڭ وقمايدانى اۋدانىندا 1453 -جىلى فاتيح سۇلتان مەحمەتتىڭ تاپسىرماسىمەن ىرگەسى قالانعان ساداقشىلار مەكتەبىنىڭ شاكىرتتەرى كوش باستاپ تۇر.

 ەرجان ءجۇنىس، ءتىلشى:

 - سايىسقا كاسىبي سپورتشىلارمەن قاتار قاراپايىم حالىق، ءبىز سياقتى جۋرناليستەر دە قاتىسىپ، باقتارىن سىناي الادى. ارينە كۇنىگە ساداق اسىنىپ جۇرگەنىمىز جوق. دەگەنمەن فەستيۆال اياسىندا ۇلتتىق سپورت تۇرلەرىنە باۋلىپ، ۇيرەتۋگە ءازىر جۇرگەن ماماندار بار. ولاردىڭ العاشقى ءدارىسىن الدىق. نىسانادان ءمۇلت كەتتىم. البەتتە دايىندىق كەرەك.

 سەلمان الپاك، ساداق اتۋ نۇسقاۋشىسى:

ساداق اتۋ - ءبىزدىڭ ءداستۇرلى سپورتىمىز، سوعىس ونەرىمىز. الەمدە ساداق اتپاعان حالىق جوقتىڭ قاسى. وسمان يمپەرياسىندا ۇرىس- سوعىستىڭ بۇل ءتۇرى قارىشتاپ دامىدى. قازىرگى تاڭدا ازداپ ۇمىت قالعانىمەن مەملەكەتتىك قولداۋدىڭ ارقاسىندا قايتا جاندانا باستادى.

فەستيۆالدە 28 كيىز ءۇي تىگىلدى. ونىڭ ىشىندە ەتنومادەني بىرلەستىكتەر وزدەرىنىڭ قولونەر مەن تۇرمىستىق بۇيىمدارىن كوپشىلىككە تانىستىردى. قازاق دياسپوراسى ەرلەر مەن ايەلدەرگە ارنالعان باس كيىم ۇلگىلەرى، بىلعارىدان تىگىلگەن زاتتار مەن كوزدىڭ جاۋىن الاتىن اشەكەي بۇيىمدارىن كوپشىلىكتىڭ نازارىنا ۇسىندى.

سەركان دينچتۇرىك، قازاق تۇرىكتەرى زەرتتەۋ جانە ءبىلىم بەرۋ قوعامىنىڭ ءتوراعاسى:

- ءبىز دياسپورا قازاقتارى بولىپ، قازاقتىڭ كيىز ءۇيىن تىگىپ، كەلگەن تۇرىك حالقىنا قازاقتىڭ ءداستۇرىن، ونەرىن تانىتىپ وتىرمىز. ونىڭ ارتىنان ءبىزدىڭ جىگىتتەرىمىز «قارا جورعا» ءبيىن بيلەپ، قوناقتارعا دومبىرانى كورسەتتى. 4 كۇنگە سوزىلعان ءدۇبىرلى شارادا ەتنومادەني بىرلەستىكتەر ساحنالىق كورىنىستەر قويدى. قازاق پەن قىرعىز دياسپورالارى «قىز ۇزاتۋ» ءداستۇرىن كورسەتىپ، حالىق اندەرىن شىرقادى.

 اۆتورلارى: ەرجان ءجۇنىس، سەدات دەنلي 

www.24.kz