ايگىلى «28 پانفيلوۆشىلار» فيلمىنىڭ قازاق تىلىندەگى دۋبلياجى اياقتالدى
فيلم قازاقستاندىق كورەرمەنگە 24 -قاراشادا قازاق جانە ورىس تىلدەرىندە كورسەتىلەدى، دەپ حابارلادى قازاقپارات ءتىلشىسى. 18 -قاراشا كۇنى الماتىدا فيلمنىڭ پرەمەراسى وتەدى. فيلمدى ر ف مادەنيەت مينيسترلىگى جانە ق ر مادەنيەت جانە سپورت مينيسترلىگى جانە «قازاقفيلم» ا ق كينوستۋدياسىنىڭ قاتىسۋمەن «28 پانفيلوۆشىلار» (سانكت- پەتەربور) تاۋەلسىز ستۋدياسى تۇسىرگەن.
رەسەيدە فيلمنىڭ پروكاتى ەكى كۇن ەرتەرەك، دۋبوسەكوۆو رازەزىندەگى ۇرىستىڭ 75 جىلدىعى مەن وقيعا وتكەن ۆولوكولامسك جولىندا 16 -قاراشادا كورسەتىلەدى. رەسەيدە جالپى اۋديتورياعا ارنالعان كورسەتىلىم 24 -قاراشادان باستالادى. فيلم وقيعاسىندا 1941 -جىلدىڭ كۇز ايىنداعى ۇرىس تۇسىرىلگەن. سۋرەتتەۋ بويىنشا 1941 -جىلدىڭ 16 -قاراشاسىندا 316 اتقىشتار ديۆيزياسىنىڭ گەنەرال پانفيلوۆتىڭ قول استىنداعى 28 جاۋىنگەرى دۋبوسەكوۆو رازەزىندە ماسكەۋگە باعىت العان جاۋدىڭ تانك باتالونىن توقتاتقان. سيۋجەت تولىعىمەن كەڭەس جاۋىنگەرىنىڭ ەرلىگىن پاش ەتۋگە ارنالعان. «28 پانفيلوۆشىلاردىڭ ەرلىگى اڭىزعا اينالىپ، حالىقتىڭ تاريحى عانا ەمەس، ۇلتتىق مادەنيەتتىڭ بولشەگىنە اينالادى. ازاماتتىق قوعامنىڭ كودى بولىپ، قانىمىزعا سىڭەدى، ونى ءوشىرۋ مۇمكىن ەمەس»، دەدى كينوكارتينا رەجيسسەرى اندرەي شالوپا.
ايتا كەتۋ كەرەك، كينونى تۇسىرۋگە نەگىزگى قارجى كراۋدفاندينگ ارقىلى جينالعان. اقشا جيناۋعا 35 مىڭ ادام اتسالىسىپ، 34,7 ميلليون رۋبل جيناعان. فيلم بيۋدجەتىنىڭ ۇشتەن ءبىر بولىگىن قازاقستان مەن رەسەيدىڭ مادەنيەت مينيسترلىكتەرى اۋدارعان. جالپى بيۋدجەتى 150 ميلليون رۋبل. فيلم ەكى ەل اۋماعىندا تۇسىرىلگەن.
باستى رولدەردە: الەكساندر ۋستيۋگوۆ، ياكوۆ كۋچەريەۆسكي، ازامات نيگمانوۆ، ولەگ فەدوروۆ، انتون كۋزنەتسوۆ، الەكسەي لونگين، ءازيز بەيشەناليەۆ، دميتري سۋتىرين، اندرەي بودرەنكوۆ، اسقار تىلەۋقابىلوۆ جانە باسقالار ويناعان. فيلمدى رەسەي جانە قازاقستان پرەزيدەنتتەرى قازان ايىندا استانادا وتكەن ەكى ەلدىڭ ايماقارالىق ىنتىماقتاستىعى فورۋمىندا كورگەن.
فيلمدى كورگەن ەكى ەلدىڭ مەملەكەت باسشىلارى الماتىدا جاساقتالىپ، ماسكەۋدى قورعاعان ديۆيزيانىڭ ەرلىگى بولاشاق ۇرپاق ەسىندە ماڭگىلىك ساقتالۋى كەرەك ەكەنىن ايتتى.
اۆتور: الماس مۇقاش ۇلى
